Hevbendiya Gelan û Jinan ji bo Azadiyê danasîna namzetên xwe didomîne

Hevbendiya Gelan û Jinan  Ji bo Azadiya hemleya xwe ya ji bo hilbijaritnên şaredariyan ku dê 11’ê Hezîranê çêbibin didomîne.

Hevbendiya Gelan û Jinan  ji bo Azadiyê ku ji 22 partî û rêxistinan pêk tê, li bajarên Çilaxa, Tebqa û Şehbayê, şahî û civîn li dar xistin, serdana şêniyan kirin û belavokên danasîna namzet û armancên xwe belav kirin û daleqandin.

Li bajarê Çilaxa ya kantona Cizîrê bi beşdariya 26 namzetên hevbendiyê, tevî namzetên ji bo hevserokatiyê Cahîde Şemo û Salih Sefo  çalakiyek hat lidarxistin. Namzetên hevbendiyê li gorî koman li nava kolanên bajar geriyan. Komeke ji 5 namzetan dirûşma hevbendiyê li kolandan daliqandin û namzetên xwe bi şêniyan re dane nasîn. Komeke din jî ku ji 6 namzetên hevbendiyê pêk dihat serdana xelkê taxa Mesrefê kirin, armanc û bernameya hevbendî bi wan dane naskirin. Her wiha belavokên danasîna hevbendiyê û bernameya wê ku bi zimanên erebî, kurdî û suryanî hatibûn nivîsandin, li şêniyan belav kirin.

Partiya Avakirin û Pêşxisina Sûriyeyê ku dê bi 12 namzetan beşdarî hilbijartinan bibe dirûşma "Di pêkanîna ewlehiyê de bibe hevkar" li  deriyên dikanan daliqandin.

Li kantona Efrîn-Şehbayê jî Hevbendiya Gelan û Jinan  Ji bo Azadiyê wêneyên namzetên xwe yên li hemû kantonan û pankatên danasîna hevbendiyê daliqandin.

Li bajarê Tebqayê jî duh ji aliyê Hevbendiya Gel û Jinan Ji bo Azadiyê ve çalakiyek hat lidarxistin. Di çalakiyê de namzetên xwe dan nasîn û bernameya xwe şîrove kirin. Her wiha wêneyên namzetên hevbendiyê û pankartên bi banga beşdariya hilbijartinan hatin daliqandin.

Namzetên hevbendiyê derketin pêşberî girse û xwe bi wan da naskirin.

(bb)

ANHA

Şehba

Tebqa

Çilaxa