Hevbendî û blok propagandayên xwe yên hilbijartinê dewam dikin

Hevbendiya Gelan û Jinan ji bo Azadiyê çalakiyek li parka Jinan a bajarê Eyn Îsayê li dar xist. Di çalakiyê de namzet dan nasîn û bernameya xwe ya hilbijartinê şîrove kir.

Di şahiyê de rêvebera Kongra Star Hedle Hec Muslim got: "Gelên me yên ku demokrasî jiyane dixwazin bi rêya hilbijattinên şaredariyan xwe rêxistin bikin û xebatên xizmetguzarî li herêmê bi pêş bixin."

Hedle beşdariya jinan û ya şêniyan a balkêş di pêşhilbijartinan de silav kir.

Hevseroka Partiya Yekitiya Demokratîk (PYD) ya Girê Spî Bêrîvan Îsmaîl got: "Gelên me dê bi îsrar û tevî êrişên giran ên dewleta Tirk a dagirker ên li dijî herêmê, tev li hilbijartinan bin."

Berdevka Nivîsgeha Partiya Sûriya Pêşerojê ya bajarê Girê Spî Fatme Şaban teqezî bi girîngiya tevlêbûna berfireh li hilbijartinên 11'ê Hezîranê kir, ji bo ku gel pêşeroja xwe xêz bike.

Piştre namzetan xwe da nasîn û nernameya xwe ya hilbijartinê aşkera kir.

Li bajarê Hesekê Partiya Nîştimanî ya Sûrî propagandaya xwe ya hilbijartinan bi şahiyekê li bajarokê Sefiye yê bakurê bajarê Hesekê dest pê kir.

Di şahiyê de bi dehan şêniyên bajarok û endamên partiyê beşdar bûn.

Di serî de rêvebera Nivîsgeha Ciwanan a partiyê Esma El Mela navên namzetên xwe aşkera kirin.

Piştre namzetê hevseroketiya bajarokê Red Şeqra Mihemed Derwîş daxuyaniyek xwend û diyar kir ku ew ê beşdarî hilbijartinan bin û barê rêvebirina herêmê hilgirin.

Sekreterê giştî yê partiyê Sabit El Cewher soza şopandina rêya şehîdan heta pêkanîna rêveberiyeke xweser a demokratîk li seranserî erdnîgariya Sûriyeyê nû kir.

Şahî bi gerandina govendan bi dawî bû.

Li gundewarê Dêrikê bi dehan şêniyên gundê Berav di şahiya Hevbendiya Gelan û Jinan ji bo Azadiyê ya li yarîgeha gundê Zuhêriyê de, beşdar bûn.

Di serî de namzetên hevbendiyê yên hevseroketiya şaredariya bajarokê Eyn Dîwarê Ridwan Cewher û Rojîn Temî armanc û bernameya hilbijartinê ya hevbendiyê aşkera kirin.

Şahî bi gerandina govendan bi dawî bû.

Tevgera Ciwanên Şoreşger a Sûriyeyê û Yekitiya Jinên Ciwan ên bajarê Çilaxa meşeke bi meşaleyan li dar xist û piştgiriya xwe ji Hevbendiya Gelan û Jinan ji bo Azadiyê re nîşan da.

(mh)