Girîngiya hilbijartinên şaredariyan hatin nîqaşkirin

Li Herêma Bakur û Rojhilatê Sûriyeyê, ji bo hilbijartinên şaredariyan, amadekarî tên kirin. Piştî Partiya Yekitiya Demokratîk û Kongra Star ragihand ku ew ê bi lîsteyekê bikevin hilbijartinan, li Hesekê di navbera hevbendî û partiyan de hevdîtin hatin kirin. 

Hevbendiya PYDˊê û Kongra Star 7 partiyên siyasî û tevger li navenda PYDˊê ya Hesekê pêşwaz kirin. Partiyên hatine pêşwazkirin ev in: (Partiya Yekitiya Suryanî, Partiya Çepa Demokrat a Kurdî li Sûrî, Tevgera Çaksazî Kurdî-Sûriya, Partiya Dîmuqrata Kurdistanê-Rojavayê Kurdistanê, Partiya Sûriya Pêşerojê, Partiya Pêşxistin û Guhartinê, Partiya Aştiya Demuqrat a Kurdistanê ).

Di hevdîtinan de li ser girîngiya hilbijartinan ji bo herêmê û gelê wê hatin nîqaşkirin. Her wiha bernameya hevbendiyê hat danasîn.

Li ser hevdîtinan, hevserokê Nivîsgeha Têkiliyan a PYDˊê Sîhanok Dîbo ji ajansa me re axivî û wiha got: "Piştî ragihandina hevbendiyê, me di civînên xwe de bal kişand ser beşdariya girseyî di hilbijartinan de. Ji ber ku ev hilbijartin girîng û stratejîk in."

Dîbo wiha domand: "Partiyên em bi wan re civîne, diyar kir ku ew ê di çarçoveya hevbendiyekê de beşdarî hilbijartinên meclis û hevserokên şaredariyan bin."

Li gorî endamên hevbendiyê, di vê çarçoveyê de hevdîtin dewam dikin.

(fr)

ANHA