Gelê Til Birakê bi daxwaza azadiya fîzîkî ya Rêber Abdullah Ocalan meşiya

Bi pêşengiya Meclisa Kongra Star a bajarê Til Birakê ya kantona Cizîrê, îro bi sedan şêniyên Til Birakê, endamên saziyên sivîl û leşkerî bi daxwaza azadiya fîzîkî ya Rêber Abdullah Ocalan meşek li dar xist.

Girseyê ji deriyê rojava yê têketina bajar dest bi meşê kir, wêneyên Rêber Abdullah Ocalan hildan û dirûşmên "Bê Serok jiyan nabe" û "Bijî berxwedana Îmraliyê" berz kirin.

Meş li Çerxerêya Hêzên Ewlekariya Hundirîn sekinî û deqeyeke rêz hat girtin. Piştre endama Meclisa Kongra Star a Til Birakê Zehra Mutleq axivî. Zehrayê di axaftina xwe de anî ziman ku têkoşîna wan heya pêkanîna azadiya fîzîkî ya Rêber Abdullah Ocalan berdewam bike û fikra neteweya demokratîk a Rêber Abdullah Ocalan wekî çareseriya herî guncaw ji qeyranên li Rojhilata Navîn re destnîşan kir.

Zehrayê anî ziman ku têkoşîna azadiya fîzîkî ya Rêber Abdullah Ocalan erkek e û azadiya wî di têkoşîna siyasî û dozên hiqûqa mirovahiyê de girîng e.

Zehrayê di dewama axaftina xwe de bang li dewleta Tirk û hikumetên dewletên din kir ku mafên siyasî û çandî yên gelê Kurd nas bikin û di dan û standinên bi pirsgirêkên civakî re rêbazên demokasiyê bipejirînin. Her wiha bang li civaka navneteweyî kir ku bi cidiyet nêzî doza Rêber Abdullah Ocalan bibin, dawî li pergala îşkence û qirkirinê bînin û zextê li desthilata Tirk bikin bila mafê hêviyê yê Rêber Abdullah Ocalan bi cih bîne.

Çalakî bi silavkirina berxwedana Rêber Abdullah Ocalan û şermezarkirina pergala îşkence û qirkirinê bi dawî bû.

(bb)

ANHA