'Fikrên Rêber Abdullah Ocalan ji Rojhilata Navîn re destkeftî ne'

Meclisa Malbatên Şehîdan û Însiyatîfa Azadiya Rêbet Abdullah Ocalan a Sûriyeyê li hola Star Layt a herêma Şiqeyêf a taxa Şêxmeqsûd a Helebê konferansek li dar xist.

Di konferansê de kesayetên Sûriyeyî, malbatên gerîlayan, endamên saziyên sivîl, partiyên siyasî, kesayetên serbixwe û nûnerên hêzên leşkerî beşdar bûn. Her wiha bi rêya onlinê cîgira serokê rêxistina Kongreya Amazîg a Cîhanî li Misrê Emanî Ebdulwahid El Weşamî û rojnamevanê Misrî Îlhamî El Milêcî beşdar bûn.

KOMPLO Û SEDEMÊN WÊ

Di serî de mijara konferansê bi zimanê erebî ji hêla hevseroka Meclisa Malbatên Şehîdan Rewşan Mihemed û bi zimanê Kurdî ji hêla endama KPC-Dˊê Zekiye Mistefa ve hat xwendin. Di mijarê de hat gotin, Abdullah Ocalan rêber, siyasetmedar, ronakbîr û fîlozof e. Pirsgirêka binpêkirina mafên demokratîk ên gelên Rojhilata Navîn di serî de gelê Kurd û sedemên wê lêkolîn kir. Jiyana xwe di naskirina sedemên krîzên aborî, civakî, siyasî û çandî de derbas kir û ji wan re çareserî peyda kirin.

Piştre sînevîzyonek li ser jiyan û têkoşîna Rêber Abdullah Ocalan û komploya li dijî wî hat pêşandan.

Piştre bi rêya onlinê Emenî Ebdulwahid El Weşamî axivî û tiştên Rêber Abdullah Ocalan jib o rizgarkirina jinan pêşkêş kirine gelekî binirx dîtin û wiha got: " Rêber Ocalan di parêznameyên xwe de her tim banga rizgarkirina jinan û wekheviyê dike. Ji ber ku jin li Rojhilata Navîn bê maf û bindest in. Destkeftiyeke mezin e ku fikrên ronakbîr Ocalan li Rojhilata Navîn belav bibin."

Nivîskar û rojnamevanê Misirî Îlhamî El Milêcî got: "Tecrîda li ser Rêber Abdullah Ocalan 25 sal derbas kir. Hemwextî wê li dijî wî cezayên dîsplînînê yên derqanûnî tên derxistin. Armanca komployê têkbirina tevgera azadiyê ya demokrat û aştiya li cîhanê bû. Ew jî bi rêya têkbirina projeya Rêbertî bû. Ji bo bidawîkirina tecrîda li ser fîlozof Abdullah Ocalan êdî dem dema bilindkirina asta têkoşînê û bilindkirina dengan e."

Xwişka şehîd Dilşêr, Sozdar Reşo axivî û wiha got: "Bi saya fikrên Rêbertî me xwe û dîroka xwe nas kir. Bi taybetî em wek jin me rolek mezin di hemû qadan de lîst, berovajî berî projeya Rêbertî. Em ê heta pêkanîna azadiya fîzîkî ya Rêber Abdullah Ocalan têkoşîna xwe bidomînin."

Rêveberê Meclisa Malbatên Şehîdan a kantona Efrîn û Şehbayê Ebdulmenan Mamo axivî û wiha got: "Rêbertî bi fîzîkî girtî ye lê belê fikrên wî di mejiyê me de ne. Em çiqas çalakiyan bikin û ji bo wî tê bikoşin dîsa jî em nikarin mafên wî bidinê. Ji ber wê jî pêwîst e em wek wî fedakariyê bikin û azadiya wî ya fîzîkî pêk bînin."

Di dawiya konferansê daxuyaniyek hat xwendin.

Di daxuyaniyê de teqezî bi domandina têkoşîna Rêber Abdullah Ocalan hat dayîn.

(mh)

ANHA