Di merasîma oxirkirina şehîd Deştî de soza tolhildanê hat dayîn

Xelkê taxên Şêxmeqsûd û Eşrefiyê cenazeyê şervanê Hêzên Rizgariya Efrînê (HRE) şehîd Arif Reşkêlo (Deştî) oxir kir. Şehîd Deştî di qonaxa duyemîn a Berxwedana Serdemê de di 28ˊê Nîsanê şehîd bû.

Bi sedan şênî li pêş Nexweşxaneya Şehîd Xalid Fecir a li beşa rojava ya taxa Şêxmeqsûdê kom bûn û beşdar îmerasîmê bûn.

Karwana şehîd li kolanên taxê geriyan û ber bi Goristana Şehîdên Berxwedana Taxên Şêxmeqsûd û Eşrefiyê ya li herêma Şiqeyêf ve ketin rê.

Li goristanê, yek ji fermandarên YPJˊê Ferhad Kobanê axivî û got: "Tevî zarokên xwe li eniyên şer ên Efrînê li dijî dewleta Tirk a dagirker û çeteyên wê têkoşiya."

Ferhad soza tolhildanê da û wiha domand: "Lihevkirinên dewleta Tirk a dagirker bi xayînan re pêk tîne, vîn me naşikînin, lê ji wê zêdetir îsrara me ya temamkirina rêça şehîd heta têkbirina dagirkerî û çeteyên wê li herêmên dagirkirî mezin dibe."

Endama Rêvebera Meclisa Jinan a Meclisa Malbatên Şehîdan Delal Mihemed axivî û wiha got: "Şehîdên berxwedan xwediyên rasteqînên ên tevahî pêşketinan in."

Bavê şehîd Deştî, Seîd axivî û got: "Şehadeta kurê min li xaka Kurdistanê pîroz be."

Dûre endama Komîteya Perwerde û Fêrkirinê ya Civaka Demokratîk Zekiye Mistefa wesîqeya şehîd xwend û radestî malbatê kir.

(fr)