Çalakiyên 25'ê Mijdarê yên Tebqayê didomin

Çalakiyên bi boneya roja 25'ê Mijdarê li bajarê Tebqayê didomin. Di wê çarçoveyê de Desteya Çand û Hunerê rêzeçalakiyên ji bo bilindkirina asta têkoşînê li dijî tundiya li ser jinan, li dar xistin.

JIN

14 mijdar, 2024 18:17

TEBQA

Bi dehan nûnerên Rêveberiya Xweseriya Demokratîk, deste û meclisên wê, Meclisa Partiya Sûriya Pêşerojê û Meclisa Kombûna Jinan a Zenûbiya yên kantona Tebqayê di rêzeçalakiyên çandê yên kantonê de beşdar bûn.

Di serî de pêşangeheke wênesaziyê li Navenda Çand û Hunerê ya kantonê hat vekirin. Di pêşangehê de tabloyên li ser jinan û vejandina hêviyê di nav zehmetiyan de, hatin pêşandan.

Li ser dika şehîd Mesna Ebdulkerîm jî şanoyek ji aliyê endama Navenda Çand û Hunerê ya Tebqayê Bêrîvan Dodex ve hat pêşkêşkirin.

Bêrîvan Dodex bal kişand ser zextên li ser jinan piştî zewacê û hewldanên lewazkirin û şikandina jinan. Her wiha Bêrîvan di dawiya şanoyê de da diyarkirin ku çareseriya tekane ya bidawîkirina tundiyê bilindkirina asta îradeyê ye.

Di dawiyê de fîlma "Xwişkên Şer" a li ser şervanên înternasyonal ên ku ji seranserî cîhanê hatin herêmê ku şerê çeteyên DAIŞ'ê bikin, hat pêşandan.

(mh/fr)

ANHA