Çalakiya Konvedanê di roja 6′an de bi banga azadiya Rêber Abdullah Ocalan dewam dike

Çalakiya konvedanê ya bi diruşma ′Ji Rêber Apo re azadî, ji pirsgirêka Kurd re çareseriya siyasî′ ya bi piştgiriya pêngava li 74 navendên cîhanê di 10′ê Cotmehê de bi diruşma ′Ji Abdullah Ocalan re azadî, ji pirsigrêka Kurd re çareseriya siyasî′ di roja xwe ya 6′an de dewam dike. Kon li pêş avahiya Komseriya Kar û Barên Penaberan a girêdayî NY′yê ya li bajêr hatiye danîn.

Di roja 6′an a çalakiyê de xelkê navçeya Amûdê ya kantona Qamişloyê, endamên Federasyona Gaziyên Şer a Bakur û Rojhilatê Sûriyeyê beşdar bûn û ji hêla xelkê navçeya Til Hemîsê û taxa Cûdî ya Qamişloyê ku şeva din nobetdarî girtin ve hatin pêşwazkirin.

Bi diruşmên ′Bê Serok Jiyan Nabe′ çalakiyên roja 6′an dest pê kirin.

Di çalakiyê de endama komîteya amadekar a çalakiyê û endama Meclisa Malbatên Şehîdan a Qamişloyê Şêrîn Mihemed bal kişand ser têkoşîna berdewam a di oxira pêkanîna azadiya fîzîkî ya Rêber Abdullah Ocalan û wiha got: "Deng û qêrîna xelk û pêkhateyên piştgirî dane azadiya fîzîkî ya Rêbertî li tevahî cîhanê tê bihîstin û heta pêkanîna armancên me, em nasekinin."

Endama Meclisa Navçeya Amûdê Mura Zoro bal kişand ser girîngiya lidarxistina çalakiyên piştgiriyê yên banga azadiya fîzîkî ya Rêber Abdullah Ocalan û got: "Têkoşîna wan weke gelan li pêş komployên li dijî wan pêk tên û li beramber fedakariyên Rêbertî têrê nakin."

Mura soza bilindkirina têkoşînê da û wiha pê de çû: "Em ê heta pêkanîna azadiya fîzîkî ya Rêber Abdullah Ocalan li qadan bin."

Li ser navê Desteya Aboriyê Suhele Şemo axivî û got tevahî siyasetên dewleta Tirk a faşîst û dewletên hegemon ên li dijî Rêber Abdullah Ocalan wan ji têkoşîn û banga azadiya fîzîkî ya Rêber Abdullah Ocalan bi dûr naxin û got: "Em jinên Bakur û Rojhilatê Sûriyeyê soza şopandina têkoşîna û meşa li ser fikra Rêbertî didin."

Endama Federasyona Gaziyên Şer a Bakur û Rojhilatê Sûriyeyê Zureya Zîlan jî got li gorî pêdiviya qonaxê û pêkanîna azadiya fîzîkî ya Rêber Abdullah Ocalan ew di têkoşînê de dewam dikin û got: "Me di oxira pêkanîna azadiya fîzîkî ya Rêbertî û azadiya welat de fedakarî kir û em ê bikin jî."

Piştî axaftinan, koma Zîlan a navçeya Dirbêsiyê li ser berxwedana Rêber Abdullah Ocalan stran gotin, sînevîzyon li ser armancên komploya navneteweyî, berjewendiyên hêzên navneteweyî yên beşdarî komployê bûne hate pêşkêşkirin, li kêlek wê jî pergala tecrîd û îşkenceyê hat şîrovekirin.

Çalakî bi beşdariya xelkê taxa Enteriyê ya Qamişloyê dewam dike.

ANHA