Bi sedan koçber bi meşekê komkujî şermezar kirin

Balafirên şer ên dewleta Tirk a dagirker duh li gundê Mesreb ê bajarê Sirînê maleke sivîlan bombebaran kir û komkujiyek pêk anî. Di encamê de di nav de 2 zarok bi giştî 3 kes ji heman malbatê şehîd bûn û 5 kes jî birîndar bûn.

Bi sedan koçberên li kampa  Girê Spî bi armanca şermezarkirina komkujiyê  û nîşandana piştevaniya xwe ya bi QSDˈê re meşek li dar xist. Şêniyan ji qada sereke ya kampê heya qada Pêşwazîkirinê meşiyan.

Di meşê de alên QSDˈê, wêneyên şehîdan û pankartên bi nivîsên silavkirina berxwedana QSDˈê hatin hildan. Dirûşmên "Bijî berxwedana QSDˈê " û "Na ji dagirkeriya Tirk re" jî hatin berzkirin.

Girese li Qada Pêşwazîkirinê ya li kampê sekinî. Li vir Hevserokê Meclisa Bajarê Eyn Îsa Sebrî Nebo axivî û êrişên dewleta Tirk a dagirker û çeteyên wê şermezar kirin.

Sebrî Nebo bi bîr xist ku komkujiya li Sirînê hemwextî salvegera 12ˈan a komkujiya li Parîsê ya li dijî têkoşer Sakîne Cansîz, Leyla Şaylamez û Fîdan Dogan pêk hat.

Sebrî Nebo berxwedana QSDˈê ya li hemberî êrişên dewleta Tirk a dagirker û çeteyên wê yên li ser Bendava Tişrînê silav kir û piştgiriya xwe bi şervanan re nîşan da.

Çalakî bi berzkirina dirûşmên "Bijî berxwedana QSDˈê", "Şehîd namirin" û "Bijî berxwedana Bendava Tişrînê" bi dawî bû.

(bb)

ANHA