‘Berxwedana jinan dê astengiyan derbas bike’

Meclisa Jinan a Sûriyeyê di çarçoveya çalakiyên 8’ê Adarê Roja Jinan a Cîhanê de, semînerek da.

Semîner bi dirûşma "Bi vîna jina azad em ê siyasetên qirkirin, dagirkerî û tecrîdê têk bibin" li hola civînan a li taxa Şêxmeqsûdê hate dayîn. Di semînerê de ku nûnerên partiyên siyasî, saziyên sivîl, meclis û komîn amadebûn, rola jinan di rêvebirina civakan de hate vegotin.

Meryana El Elî semîner bi rêve bir.  Meryanayê bal kişand ser biryara Konseya Ewlehiyê ya NY’yê ya 1325’an a sala 2000’î û got: “Bi vê biryarê rola pêşengiya jinan di pêkanîna aştî û ewlehiya navneteweyî de tê naskirin.”

Maryan El Elî wiha domand: “Di biryarê de tekezî li ser wê yekê tê kirin ku jin di hemû waran de %30 rola xwe bilîzin, lê divê jin bi vê yekê razî nebin û xwe pêş bixin, rola sereke bilîzin û xwe îspat bikin ku ew dikarin rê û rêgezên xwe diyar bikin û pêşengiyê bikin.

Meclîsa Jinan a Sûriyeya Demokratîk Zeyneb Qenber jî bal kişand ser rola jinan û got: “Divê em jin bi berpirsyariya xwe ya dîrokî hest bikin û bibin çavkaniya aştî û ewlehiyê. Yekitiya me ya jinan wê bi bibe gava yekem a yekitiya gel û civakan.”

Endama Mala Êzidiyan Canê Misto jî bal kişand ser hêz û îradeya jinan û wiha got: “Hêz û berxwedana jinan li ser şert û mercên ku rê li ber armanca wan digire bi ser dikevin û divê em 8’ê Adarê wek xala destpêkê binirxînin. Ji bo qonaxeke nû ya berxwedanê bi mezinkirina têkoşîna xwe ya ji bo bidestxistina azadiya xwe."