Alîkarî li hezar û 100 malbatên koçber tên belavkirin

Alîkariyên ku ji aliyê saziyên xêrxwaziyê yên Başûrê Kurdistanê ve hatin şandin, li koçberên li Qamişloyê bi cih bûne tên belavkirin.

ROJANE

19 sibat, 2026 12:52

QAMIŞLO

Heyva Sor a Kurd îro paketên xwarinê yên ku ji aliyê Dezgeha Kerkûkê ya Xêrxwaziyê ve hatine şandine, li hezar û 100 malbatên koçber belav kirin.

Alîkarî li Staduyma Şehîdên 12’ê Adarê li koçberên ji Efrîn, Şehbayê û Helebê yên li taxên Kornîş û Xerbî yên bajarê Qamişloyê dimînin, hatin belavkirin. Belavkirina alîkariyan dê sibe li taxên Kornîş, Xerbî, Hilêliyê, Qidûrbeg, Enteriyê, Erbewiyê û Cûdî dewam bike.

Hêjaya bi bîrixstinê ye ku Dezgeha Kerkûk a Xêrxwaziyê bi 2 karwanan 27 kamyonên barhilgirên alîkariyê şandin Rojava. Karwana yekemîn ji 15 kamyonan û ya duyemîn ji 12 kamyonan pêk dihat. Her wiha 45 ton derman ku ji aliyê Dezgeha Xêrxwaziyê ya Kerkûkê, Kanal 8 û Biloka Helwest ve hatibû şandin. Jê 40 ton radestî Nexweşxaneya Gel hatin kirin û 5 ton li klînkên gerok hatin belavkirin.

Koçberên ji Efrîn, Şehba û Helebê yên vê dawiyê ji ber êrişên li ser Tebqa, Reqa û taxên Şêxmeqsûd û Eşrefiyê yên Helebê ji warê xwe bibûn, sûdê ji van alîkariyan werdigirin.

(bb)

ANHA