“Qanûnên mirovî yên navneteweyî” bû mijara panelekê li Tebqayê

Rêvberên komîteyên Meclisa Rêveber û endamên Nivîsgeha Kombûna Jinan a Zenûbya tev li panelê bûn ku li holê civînan a avahiya Rêveberiya Sivîl a Tebqayê hate lidarxistin

Endama Rêveberiya Nivîsgeha Hiqûqî ya Meclisa Rêveber a Tebqayê, Fîda El Ebdullah mijarên panelê yên têkildarî rêgezên qanûnên mirovî yên navneteweyî şîrove kirin.

Fîda El Ebdullah got: “Qanûn, di dema nakokiyên çekdarî de, kesên tev li şerê nebûne yan jî dev jê berdane, diparêze. Her wiha avahî û milkên ku têkiliya wan a yekser bi operasyonên leşkerî jî tune ye diparêze.”

Fîda El Ebdullah çarçoveya şexsî ya qanûnê şîrove kir û got: “Çarçoveya şexsî ya qanûnê; diyarkirina beş û kesên ku divê di nakokiyên çekdarî de werin parastin e. Têgîna “Kesên parastî” yan jî “Beşên parastî” lê tê kirin.”

Seroka Komîteya Jinan a Tebqayê, Wela El Nacî rêgezên giştî yên qanûnê diyar kirin û got: “Qanûn, aliyên nakok neçar dike ku di şer de gelek rêgezan pêk bîne. Ev rêgez li gorî peymanan hatine dayîn.”

Welat El Nacî wiha domand: “Ev rêgez, kes û milkan diparêze. Bikaranîna hêzê û tundiyê di nakokiyên çekdarî de sînordar dike ku di encamê de sivîlên tev li operasyonên leşkerî nebûne, tên parastin.”

Di dawiyê de, beşdarên panelê, mijarên panelê nîqaş kirin û nêrînên xwe parve kirin.

(dm)

ANHA