Li Şehbayê ji bo hewldana ketina PDK’ê li Şengalê xwepêşandan hat lidarxistin

Bi sedan koçber Efrînê, şêniyên kantona Şehba û endamên Yekitîya Êzîdiyên Efrînê ‎xwepêşandanek têkildarî hewldanên ketina hêzên PDK’ê ji Şengalê re li dar xist. Hem wextî wê Mala Êzidî ya Helebê daxuyaniya piştgiriyê ji Şengalê re da.

6 cotmeh, 2021 13:38

NAVENDA NÛÇEYAN

Yekitiya Êzîdiyên Efrînê li bajarokê Til Rifet a kantona Şehbayê, xwepêşandanek li ‎dar xist. Xwepêşandêran nerazîbûna xwe li hember hewldanên hêzên PDK'ê yên ketina ‎Şengalê nîşan da.‎

Xwepêşandan ji navenda navçeya Til Rifetê dest pê kir û li kolanên bajarokê geriya. ‎Xwepêşandêran alên Yekitiya Êzîdiyan hildan û diruşmeyên şermezarkirina sûcên PDK'ê ‎berz kirin.‎

‎'PDK'Ê LI HEMBERÎ DAIŞ’Ê REVIYA, DIVÊ HEWLDANÊN KETINA ŞENGALÊ RAWESTÎNE'

‎

Xwepêşandan li çarxereya şehîdên komkujiya Til Rifetê ya navenda navçeyê vegerî mêtîngê. ‎Xwepêşandan bi deqeyeke rêzgirtin dest pê kir, piştre li ser navê Yekitiya Êzdiyên Efrînê ‎Silêman Cefer axivî û bang li PDK'ê kir ku dev ji destwerdana karûbarên Şengalê berde û got: "Ka ‎em bi hev re bînin bîra xwe ku kê Şengal ji çeteyên DAIŞ’ê rizgar kir. Ma ne gerîla ji bo ‎parastina Şengalê qurbanî da? Em bînin bîra xwe ku hêzên PDK'ê çawa ji li hember ‎çeteyên DAIŞ reviyan. Ji ber vê yekê divê PDK'ê dev ji hewldana ketina Şengalê berde. "‎

Cefer piştrast kir ku tenê keç û xortên Şengalê dikarin Şengalê biparêzin û bi rêve bibin û ‎wiha domand: “Welatiyên Şengalê kesên ku destwerdana şengalê bikin û desthilatdariya xwe ‎li ser wê vegerînin qebûl nakin, ji ber vê yekê dê Şengal ji bo şêniyên Şengalê be.”‎

‎'ARMANCA KOMPLOYA NAVNETEWEYÎ YA LI DIJÎ RÊBER OCALAN Û ARMANCA ‎HEWLDANA KETINA ŞENGALÊ, HEMAN TIŞT E '

‎

Hevserokê Meclisa bajarokê Til Rifet, Mihemed Henan bal kişand ser komploya navneteweyî ya li dijî rêber ‎Abdullah Ocalan û got: "Her tiştê ku li dijî gelê Kurd diqewime bi hev ve girêdayî ‎ye. Armanca komploya li dijî rêber Abdullah Ocalan, heman armancên dijmin ên hewldana kontrolkirina ‎Şengalê ye. Ji ber ku hemû welatên dijber dixwazin axa Kurdistanê dagir bikin û gelê Kurd ‎tune bikin."‎

Henan di dawiya axaftina xwe de bang li gel kir ku li dijî hêzên dijmin serî hildin û got: "Divê ‎gelê me li dijî siyasetên dijmin ên ku hebûna me hedef digirin, serî hildin. Her wiha ji bo ku ‎em rê li hember hewldanên dijmin bigirin divê em bi hemû hêza xwe li ber xwe bidin."

‎Xwepêşandan bi diruşmeyên silavkirina berxwedana gelê Şengalê bi dawî bû.‎

‎'MALA ÊZÎDIYAN LI HELEBÊ HEWLDANA KETINA ŞENGALÊ ŞERMEZAR KIR '

‎

Têkildarî heman mijarê, Mala Êzîdiyan li taxên Şêxmeqsûd û Eşrefiyê yên bajarê Helebê bi ‎beşdarbûna bi dehan êzîdiyan, îro daxuyaniyek ji raya giştî re li ber mala êzîdiyan da.‎

Endama rêveber a Yekitiya Jinên Êzidî ya Rojava Raniya Cafer daxuyanî xwend. ‎‏ ‏

Di daxuyaniyê de hate gotin ku piştî çend hewldan, komplo û planên dagirkirina Şengalê, binpêkirina ‎nasnameya gelê êzdî û gelê Kurd bi giştî û tunekirina dîroka neteweya Kurd, îro em dibînin ‎ku PDK'ê di warê leşkerî de destwerdana Şengalê dike û tevî nerazîbûna şêniyên Şengalê ‎yên ku bi serdestiya hikumeta Iraqî, PDK'ê, dewleta Tirk û çeteyên wê rû bi rû mane, dîsa ‎jî dixwaza bikeve Şengalê."‎

Di daxuyaniyê de hat destnîşankirin ku gelê Şengalê bi darê zorê hatin koçberkirin, ‎jinên wan dîl hatin girtin, zarok hatin kuştin û sûcên herî mezin li dijî gelê me yê li Şengalê ‎hatin kirin û di dema Rêveberiya Xweser de ew ji birêvebirina xwe bê par man. ‎

‎'EM PIŞTGIRIYA GELÊ XWE YÊ ŞENGALÊ DIKIN '‎

Di berdewama daxuyaniyê de lê hat zêdekirin ku: "Em gelê êzîdî li Mala Êzîdiyan li Helebê, piştgiriyê ‎didin gelê xwe yê li Şengalê, em li kêleka wan in û rê nadin ku tu plan û peymanek li ser ‎hesabê gelê me yê Şengalê pêk were."‎

Mala Êzîdiyan li Helebê bang li rêxistinên mafên mirovan ên navneteweyî kir ku bi lez ‎destwerdanê bikin û rê nedin PDK'ê ku bikeve axa pîroz a Şengalê û êzîdiyan ji fermanên ‎nû biparêzin.‎

Daxuyanî bi diruşmeyên silavkirina berxwedana gelê Şengalê bi dawî bû.‎

‏(dx)

ANHA