​​​​​​​‘Îtîlaf bûye amûra pêkanîna armancên dagirkeriyê yên dewleta Tirk’

‘Îtîlafa Wetenî ya Sûriyê’ di destê dewleta Tirk bûye amûreke ku ajandeyên wê yên li Sûriyê pêk tîne, ji dagirkirina herêmê bigire heta bigihêje guhertina demografîk, koçberkirin û tirkkirina herêmê.

Endamên Îtîlafê li ser hesabê gelê Sûriyê hewl didin berjewendiyên xwe yên şexsî pêk bînin. Ji bo wê bazaran li ser axa Sûriyê dikin û bang li dewleta Tirk dikin ku mudaxele li kar û barên Sûriyê bike. 

Der barê mijarê de endama Rêveberiya Jinan a Partiya Hevbendiya Nîştimanî ya Demokrat a Sûriyê şaxê Minbicê Mune El-Mixlif got: “Bûyerên li Sûriyê rû dane ji destpêkê ve serhildaneke gel bû ku dixwazin hinek guhertinan pêk bînin. Lê bi lez di encama mudaxeleyên hêzên derve û yên herêmî de veguherî serhildaneke çekdarî. Îtîlafa Wetenî jî ya ku şoreşa Sûriyê temsîl kir, pişta xwe da hêzên herêmî, di serî de dewleta Tirk.”

Mune wiha domand: “Ji ber wê dewleta Tirk şoreş ji wateya wê ya rastîn dûr xist û êdî bû şoreşa çeteyan. Bi rêya Îtîlafê jî dewleta Tirk dagirkirina axa Sûriyê bi hinceta piştgiriya Artêşa Azad û Îtîlafê rewa kir.”

Mune da xuyakirin ku dewleta Tirk bi rêya wan çeteyan dagirkirina xaka Sûriyê rewa dike, demografiya wê diguherîne, şêniyên wê yên resen dide koçberkirin û li şûna wan malbatên çeteyan bi cih dike.

Muxa El-Mixlif kiryarên Îtîlafê yên li hemberî gelê Sûriyê şermezar kirin û bang kir ku hemû hêzên biyanî û herêmî yên li Sûriyê derkevin û wiha gotinên xwe bi dawî kir: “Aloziya Sûriyê tenê bi rêya aliyên sûrî û li ser masaya diyalogê çareser dibe ku hêviyên gelê Sûriyê yên yekitiyê, azadiyê û demokrasiyê pêk tîne.”

(şx)

ANHA

<iframe width="560" height="315" src="https://www.youtube.com/embed/OtYUdEqLyPQ" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>