Li Helebê Navenda Lêkolînên Jineolojî hate vekirin

Bi sedan şêniyên taxên Şêxmeqsûd û Eşrefiyê, nûnerên Navenda Jineolojî ya herêma Şehbayê, nûnerên saziyên sivîl û partiyên siyasî yên taxê beşdarî merasîmê bûn.

Merasîm bi deqeya rêzgirtin a bîranîna şehîdan dest pê kir. Ji rêveberên Kongreya Star Zeyneb Efrîn vekirina Navenda Lêkolînên Jineolojî li tevahî jinên taxê pîroz kir û got: "Em îro li dergûşa şaristaniyê li taxa Şêxmeqsûd a Helebê navenda Jineolojiya vedikin, da ku jinên ji hemû pêkhateyan di nav xwe de kom bike."

Zeyneb Efrîn destnîşan kir ku ji barbanga dîrokî û heta roja me ya îro li dijî jinan zilm û piştaftin ji aliyê pergalên baviksalarî û desthilatdar ve tê meşandin û wiha domand: "Lê jin serî netewand û teslîmkarî qebûl nekir. Em îro berhemên vê serhildanê di kesayeta jin a di nava  Tevgera Rizgariya Jinan de  dibînin ku ji bo jiyaneke azad û hevjiyana azad tê dikoşin."

Endama Koordînasyona Kongreya Star Zeyneb Îbo axivî, bal kişand ser rola jina di şoreşa Rojava de û diyar kir ku bi şoreşê re jinan di her qadan de, leşkerî, siyasî û civakî de xwe îsbat kir û bi fikirê xwe azad bû û ji bo civakeke exlaq û polîtîk tê dikoşe.

Di merasîmê de enadma rêveber a Navenda Lêkolînên Jineolojî Yasmîn Menan axivî û destnîşan kir ku ev navend bi boneya rojbûna rêber Abdullah Ocalan ê ku ji bo azadiya jinan tê dikoşe, hate vekirin, da ku dilsoziya jinan bi têkoşîna rêbertî re îsbat bike.

Piştî axaftinan, dayika şehîd Nûrhaq û bavê şehîd Alan navend vekirin.

Koma Vejîn, hunermend Fatima Ebdo yên girêdayî navenda Çand û Hunerê ya Cemîl Horor stran gotin, koma Stêrka Efrînê dîlanên folklorî pêşkêş kirin.

Merasîm bi gerandina xelekên govendê li ber stranên şoreşgerî bi dawî bû.

ANHA