Ji bo desteka berxwedana girtîgehan jinên Reqayê jî dest bi greva birçîbûnê kir

Ji bo piştgiriya berxwedana parlamanter Leyla Guven, Rêveberiya Jinan a Reqayê li hola civînan a Saziya Malbatên Şehîdan a li navarasta bajêr, dest bi hemleya greva birçîbûnê kir. Dê greva birçîbûnê 2 rojan dewam bike.

Di roja yekemîn de 73 jinên ji nivîsgehên jinan ên Meclisa Sivîl a Reqayê, Partiya Sûriya Pêşerojê, Komîteya Fêrkirin û Perwerdeyê, Şaredariya Gel a Reqayê, dayik û hevjînên şehîdan, nûnerên rêxistinên civaka sivîl û Meclisa Jinan a Sûriyê, beşdarî hemleyê bûn.

Hemle bi daxuyaniyeke Rêveberiya Jinan a Reqayê dest pê kir. Endama Rêveberiya Jinan Tesnîm Necar daxuyanî xwend û tê de wiha hate gotin:

 “Ji vê xaka ku bi xwîna şehîdan hatiye avdan, em dest bi hemleya greva birçîbûnê heta 2 rojan dikin. Em hemû girtinên ji aliyê dewleta Tirk û çeteyên wê ve şermezar dikin.

Ji xaka Firatê, ji xaka berxwedanê em bang li hemû welatên cîhanê û rêxistinên mafên mirovan dikin ku li hemberî hikumê der heqê têkoşer Leyla Guven de ku mînaka berxwedanê ji bo hemû jinên cîhanê ye û sembola têkoşîna aştiyane û sivîl e, helwesteke mirovî û cidî nîşan bidin.

Em tekez dikin ku em têkoşîna xwe ya ji bo parastina jinan bidomînin û em ê her rojê ji bo jinan veguherînin serkeftinê."

Piştre şandeyên jinan serdana cihê çalakiyê kir û bi navê Nivîsgeha Jinan a Partiya Sûriya Pêşerojê Henan Mihemed, bi navê Saziya Malbatên Şehîdan Hîbe El-Ebdullah û bi navê Komîteya Jinan a Meclisa Sivîl a Reqayê Nadiye El-Yûsif, axivîn.

Axaftvanan got jinên behsa azadiyê dikin ji aliyê hikumetan ve tên hedefgirtin, ji lew re divê baweriya wan hebe ku dê rojekê îradeya jinan mezintir û serbixwe bibe û dê jin berê xwe bidin azadiyê.

Piştre sînevîzyonek li ser binpêkirinên hikumeta Tirk li dijî girtiyên siyasî, hate pêşandan.

Tê payîn ku hemle 2 rojan dewam bike û şandeyên sivîl û siyasî serdana çalakvanên greva birçîbûnê bikin.

(cx)

ANHA