Ji ber dagirkeriyê li Til Temirê çandinî paşde ketiye

Navçeya Til Temir a girêdayî kantona Hesekê bi çandina ceh û genim navdar e. Lê çandiniya îsal ji salên derbasbûyî cuda ye. Ji ber ku dewleta Tirk a dagirker û çeteyên wê rûbereke fireh ji zeviyên gundewarên rojavayê navçeyê dagir kirine, her wiha şêniyan zeviyên xwe yên li aliyê bakurê bajêr ên li ser rêya Til Temir, Ziran û Ebû Rasên ji ber topbarana artêşa Tirk neçandin.

Di hefteya derbasbûyî de li gundewarên rojavayê rêya navneteweyî M4, zîpik bariya û berhemên çandiniyê zirareke mezin dît.

Der barê rewşa çandiniya îsal li navçeya Til Temir û gundewarên wê de cotkarê bi navê Remo El-Heyder ê ji şêniyên gundê Qibûr El-Qercene yê navçeya Zirganê, got: "Nêzî 63 gundan li ser rêya Til Temir-Zirganê ne û ji wan 27 gund ji aliyê dewleta Tirk a dagirker û çeteyên wê ve hatine dagirkirin. Her wiha nêzî 21 gund di nava xetên şer de ne û ji ber metirsiyên şêniyan ji topbaran an jî şewitandinê, zeviyên xwe neçandin."

Remo El-Heyder wiha domand: "Ji ber artêşa Tirk a dagirker û çeteyên wê herêm dagir kiriye, rûberên fireh nehatin çandin. Her wiha di hefteya derbasbûyî de zeviyên gundewarên navçeya Til Temirê rastî pêleke sermayê hatin û ji ber wê jî beşek ji zeviyan zirar dît. Artêşa Tirk a dagirker û çeteyên wê jî agir bi zeviyên çandiniyê yên li gundewarên li ser rêya Til Temir-Zirganê dixin."

Hevserokê Komîteya Çandiniyê ya Til Temirê Saîd Nayif bal kişand ser rewşa çandiniya li navçeyê û şêwazên destekdayîna ji cotkarên ku zirar dîtine. Nayif piştrast kir ku aliyên pêwendîdar alîkarî dan şopandina birêxistinkirina dewreya çandiniyê, madeyên pêwîst ji cotkar û zeviyan re mîna semad, top û sotemeniyê peyda kirin.

Nayif diyar kir ku Komîteya Çandiniyê ya Kantona Hesekê agahî da ku divê komîteya diyarkirina miqdarê zirarên ku gihaştine zeviyan were avakirin û wiha domand: "Komîteya Çandiniyê ya Til Temirê komîteyek ava kir û ber bi zeviyên çandiniyê ve şand da ku miqdarê zirarên gihaştine wan, diyar bike."

Li gorî Nayif raporên komîteyê yên destpêkê ku zêdetirî 25 hezar donim ji zeviyiên ceh û 4 hezar donim ji zeviyên genim zirar dîtine û hê jî şopandin didome.

(bx)

ANHA