Desteya Tenduristiyê tecrubeya teşhîsê ya Koronayê di 30 çirkeyan de, ragihand

Îro Desteya Tenduristiyê ya Bakur û Rojhilatê Sûriyê civîneke çapemeniyê li hola civînan li avahiya Daîreya Têkiliyên Derve ya li bajarê Qamişlo li dar xist ku tê de tecrubeya ku dikare nexweşiya vîrusa Koronayê ya nû di 30 çirkeyan de teşxîs bike, ragihand. Her wiha ev bi encama keda hevpar a Desteya Tenduristiyê ya Rêveberiya Xweser a Bakur û Rojhilatê Sûriyê û peymangeha PIS a Swêdê pêk hat.

Hevserokê Desteya Tenduristiyê ya Rêveberiya Xweser a Bakur û Rojhilatê Sûriyê Ciwan Mistefa wiha got: "Bi belavbûna vîrusa Koronayê li tevahî cîhanê û rewşa metirsiyê di navbera tevahî cîhanê de û lezbûna belavbûna wê, laboratuarên (taqîgeh) cîhanê bi lez hewl didin vîrusê zû teşhîs bikin û dermanan jê re bibînin."

Di civînê de Dr.Ciwan Mistefa diyar kir ku Rêveberiya Xweser a Bakur û Rojhilatê Sûriyê û tevahî kadroyên wê tevî derfetên kêm û rewşên ku tê re derbas dibin, hewl da piştgiriya li hember vîrusê bike ku gefên li tevahî mirovahiyê dixwe.

Mistefa ragihand ku piştî xebata hevpar û bênavber a Desteya Tenduristiyê û peymangeha PIS a Swêdê vedîtineke nû di laboratuarên xwe de dîtine û wiha da zanîn: "Bi rêya tîma xebata pispor û diyarkirî, me karî gelek tecrube û lêkolînan bikin ku bi encamên pir baş pêk hatin, her wiha dê ev encam piştevaniya dorpêç û serweriya li vîrusa Koronayê ya xeternak û kujer bike."

Mistefa diyar kir ku ew gihîştin tecrubeya “KÊD” ku dikare nexweşên vîrusa nû di 30 çirkeyan de teşhîs bike, her wiha ev vedîtin berhema xebata hevkar a Desteya Tenduristiyê ya Rêveberiya Xweser û peymangeha PIS a Swêdê ye.

Heta niha tu kes negihîştiye vê KÊD’ê ku dikare nimûneyekê ji belxema kesên nexweş bibe û test bike.

Di dirêjahiya axaftina xwe de Mistefa wiha domand: "Ev vedîtin û KÊD encama dawîn a lêkolînên hevpar e û hevrikeyeke li ser asta tevahî cîhanê ye ku heta niha negihîştine vê encamê. Ev vedîtin li 3 nexweşxaneyên Wohan a Çînê hatin tecrubekirin, her wiha encamên wê ji sedî 80 heta 85 erênî bûn."

Mistefa wiha bi dawî kir: "Cudahiya vê tecrubeyê ew e ku dikare bertekên ku di xwîna spî (spîgilorik) ya di laşê mirov de ber bi tiştekî biyanî de dilive, binase, her wiha tê de tu madeyên kîmyewî yên zirarê bigihînin mirov tune ne û tu zirarê nagihîne hewayê jî, bi wateyeke din ewle ye."

(fr)

ANHA