Bi boneya 8’ê Adarê li kantona Şehbayê şahî

Bi beşdariya bi hezaran jinan şahiya 8’ê Adarê li gundê Meret El-Mislimiyê yê navçeya Ehdas a kantona Şehbayê dest pê kir.

8 adar, 2020 09:53

ŞEHBA

Îro bi hezaran şêniyên kantonên Efrîn û Şehbayê berê xwe da cihê şahiya 8’ê Adarê ya li gundê Meret El-Mislimiyê yê navçeya Ehdas a kantona Şehbayê da ku beşdarî şahiyê bibin.

Şahiyê bi meşa Yekitiya Jinên Ciwan ji kolana sereke ber bi Meret El-Mislimiyê ya navçeya Ehdas ve ku cihê şahiyê ye, dest pê kir.

Qada şahiyê bi wêneyên Arîn Mîrkan, Barîn, dayika Eqîde, Hevrîn Xelef, wêneyên têkoşerên Berxwedana Serdemê û YPJ’ê hat xemilandin. Her wiha alên Kongreya Star, Yekitiya Jinên Ciwan û wêneyên rêber Abdullah Ocalan hatin hildan. Tişta herî balkêş a şahiya îsal, lixwekirina jinan a cilên kurdî yên folklorik e.

Bi dirûşma "Têkoşîna me azadî ye, berxwedana me serkeftin e" beriya çend kêliyan şahiya Roja Jinan a Cîhanê bi deqeyeke rêzgirtinê dest pê kir. Piştre perspektîfên rêber Abdullah Ocalan ên der barê 8’ê Adarê de hatin xwendin.

Dûre nameya Kongreya Star der heqê Roja Jinan a Cîhanê de ji hêla endama rêveber Zelûx Seydo ve hat xwendin. Her wiha dê endama rêveber a Yekitiya Jinan a Azad a Şehbayê Narîman Husên biaxive.

Dê şahî bi pêşkêşkirina stranan ji hêla Tîma Şehîd Mizgîn a girêdayî Hîlala Zêrîn ve berdewam bike, her wiha dê Tîma Şehîd Barîn a girêdayî Hîlala Zêrîn şanoyekê bi navê "Jin jiyan e, jiyanê nekujin" pêşkêş bike û piştre dê ji hêla Tîma Şehîd Viyan Soran ve dîlan bê gerandin.

(fr)

ANHA