Yên ku ji dewleta Tirk bawer dikin, poşman dibin

Ji ber êrişên artêşa Tirk a dagirker ên li ser herêmên Bakur û Rojhilatê Sûriyê bi hezaran sivîl koçber bûn. Koçberî li piraniya herêmên nêzî xetên şer berdewam e.

Di encama zêdebûna hejmara koçberan de Rêveberiya Xweser a Bakur û Rojhilatê Sûriyê 64 navend li bajarê Hesekê amade kirin. Tevî Kampa Weşûkanî ya ku bi 12 km li rojavayê bajarê Hesekê ye.

Koçberê bi navê Casim El-Mihemed ji şêniyên gundê Lêlan ê girêdayî Serêkaniyê ye. El-Mihemed behsa binpêkirinên artêşa Tirk a dagirker û çeteyên “Artêşa Watanî ya Sûriyê” yên li dijî malbata wî kir.

El-Mihemed got: "Ji ber wan çeteyên girêdayî Tirkiyê em ji warên xwe derketin. Ew çete îdia dikin artêşek watanî ne lê belê bi xwe komên terorîst û diz in. Çeteyan malên me talan kirin. Genim, ceh, xetasên avê, jenerator, madeyên germkirinê û tevahiya alavên çandiniyê talan kirin."

Bi dehan malbatên bi îdiayên artêşa Tirk a dagirker hatin xapandin. Di nav de malbat a Casim El-Mihemed. Dayîka wî diçe gund da ku mala xwe saxî bike. Lê çete gefan li dayîka wî dixwin. El-Mihemed di vî warî de got: "Tevî ku temenmezin û nexweş e lê gefa kuştinê lê xwarin. Çeteyekî çek da ser sîngê wê."

El-Mihemed diyar kir beriya artêşa Tirk a dagirker û çeteyên wê gundê dagir bikin, di depoya mala wan de 500 turên ceh û 40 turikên genim hebûn. El- Mihemed got: “Lê tenê 30 turik ji genim û ceh mabûn. Dayîka min ji çeteyên girêdayî tugeya El-Sultan Murad xwest wan turikan bi dizîka derxîne. Jê re gor divê ew destûrê ji emîrê xwe bixwaze. Lê emir ew tişt red kir. "

El-Mihemed destnîşan kir ku dema koçber bûne bavê wî ji mal ji ber tirsa li ser milkên xwe derneketiye û wiha berdewam kir: "Piştî derketina ji gund, çeteyan bavê min revandin. Li beramberî serbestberdana wî 5 milyon lîreyên Sûriyê xwestin. Me tiraktora xwe firot û fîdye da."

Di dawiyê de Casim El-Mihemed spasiya kedên Rêveberiya Xweser a ku alîkariyan pêşkêş dike,  kir.

(şx)

ANHA

<iframe width="560" height="315" src="https://www.youtube.com/embed/xMzQKgTowVE" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>