Dewleta Tirk demografiya Girê Spî diguherîne 

Artêşa Tirk û çeteyên wê yê Cebhet El-Nusra û DAIŞ’ê di 9 Cotmehê de bi armanca têkbirina projeya demokratîk û guhartina demografiya herêmê, êrişî herêmên Bakur û Rojhilatê Sûriyê kir.

Di encama êrişên artêşa Tirk de ku hê jî berdewam in, bi hezaran şêniyên herêma nêzî sînorê Sûriye-Tirkiyê koçber bûn, di gel ku artêşa Tirk li dijî sivîlan komkujî pêk anîn û çekên qedexekirî bi kar anîn.

Dewleta Tirk bi dagirkirina herêmên Bakur û Rojhilatê Sûriyê re hewl dide demografiya herêmê biguhere û planên Osmaniyan ên nû li dewletên derdorê bide meşandin. Nîşana vê yekê jî dagirkirina Idlib, Cerablus, Bab û Efrînê yên bakurê Sûriyê ye.

Piştî artêşa Tirk a dagirker bajarên Girê Spî û Serêkaniyê dagir kirin, şêniyên wê neçar man koçber bibin û paşê dest bi guhartina navên bajar, sazî, tax, dibistan û şaristaniya bajaran kir û herêm li komên çeteyan dabeş kir.

Di vê çarçoveyê de gelek wêne li ser medyaya civakî belav bûn û tê de diyar e ku ji deriyê Babê yê li ser sînor çete derbasî Girê Spî dibin û di dîmenan de diyar dibe ku mal û milkên welatiyan desteser dikin û navên çeteyan li ser dikanan hatine nivîsandin.

(eh)

ANHA