Li Hesekê cenazeyên şehîdên Berxwedana Rûmetê hatin veşartin

Girseya gel cenazeyên şervanên QSD‘ê  Mehmûd Ubêd (Zagros Hesekê), Elî Xizêm (Arkêş), Ehmed El-Sebrî (Merwan Hesekê), Heysem Eyo (Çiyareş Hesekê), Ciyawar Hisên (Şahîn Numan), Muhened El-Qati (Hemûdî Hesekê), Mîlad El-Telaa (Rênas Hesekê) û şervanê Hêzên Xweparastinê Hesen El-Xelef ên di Berxwedan Rûmetê  de li Serêkaniyê şehîd bûne ji ber Navenda Meclisa Malbatên Şehîdan a bajarê Hesekê wergirtin û bi kerwanekî berî dan Goristana Şehîd Dijwar a li gundê Dawidiyê.

Li goristanê merasîm bi deqeyek rêzgirtin û torenek leşkerî ji hêla YPG û YPJ`ê ve destpê kir. Piştre endamê Meclisa Malbatên Şehîdan a kantona Hesekê Îbrahîm Hisên axivî, sersaxî ji malbatên şehîdan re xwest û got: "Civaka me banga aştiyê dike, guneha wê ew e ku banga biratiya gelan û jiyana hevpar dike. Tevahiya cîhanê li dijî gelên Bakur û Rojhilatê Sûriyê bûn yek. Lê em dibêjin çendîn hêza dijminên mezin be em ê di dawiyê de biserkevin."

Ji aliyê xwe ve endamê Partiya Yekitiya Demokratîk Mistefa Ehmed got: "Divê em armanca vî şerî bi zanibin ku çand, mirovahî û biratiya gelan ên ku me li ser bingeha neteweya demokratîk ava kirine têk bibin."

Bi navê Hêzên Sûriye Demokratîk li bajarê Hesekê Hogir Mele axivî û got: "Me ji tevahiya cîhanê re îsbat kir ku em axa xwe ji dijmin re nahêlin. Em soz didin tevahiya malbatên şehîdan û gelê xwe yê Bakur û Rojhilatê Sûriyê ku em ê li hember her êrîşekê bi sekinin û heta dawiyê li berxwe bidin."

Piştî wê wesîqeyên şehadetê yên şehîdan ji hêla endama Meclisa Malbatên Şehîdan Rojda Ehmed ve hate xwendin û radestî malbatên wan kirin.

Şêniyan cenazeyên şehîdan di nav tilîliyên dayîkan û bezkirina dirûşmeyên Berxwedana Rûmetê de spartin axê.

(şx)

ANHA