‘Em herêma tampon di desthilatdariya Tirkiyê de naperjirînin‘

EMÎNA EL-ELÎ / REQA

Îro li bajarê Reqayê bi sedan jin daketin kolanan û gefên Tirkiyê li dijî herêmên Bakur û Rojhilatê Sûriyê şermezar kirin. Jinên ku ji ANHA‘yê re axivîn diyar kirin ku herêma tampon a ku Tirkiyê dixwaze li herêmê ava bike dagirkerî ye.

Rêvebera Mala Jinan a Reqayê Zelîxa Ebdî gefên Tirkiyê yên li dijî herêmên Bakurê Sûriyê şermezar kirin û wiha axaftina xwe dewam kir: ‘‘Ev herêm bi têkoşîn û fedekariya şervanên Hêzên Sûriya Demokratîk hatine rizgarkirin, niha jî Erdogan dibêje ez ê wan rizgar bikim,  gelo Erdogan dê herêmê ji welatiyên wê rizgar bike û weke çawa li Efrînê kir çete û malbatên wan li wir bicî bike?‘‘

Zelîxa diyar kir ku ew wek welatiyên herêmê, vê herêma tampon di bin desthilatdariya  Tirkiyê de neperjirînin û wiha anî ziman: ‘‘Ev herêm dê dagirkeriyeke bi şêweyên nû be, li şûna ewlehiyê dê wan koçber bikin.‘‘

Zehra Mihemed jî gefên Tirkiyê şermezar kirin û diyar kir ku Erdogan ji hêz û rêxistina jinan ditirse, ji netewa demokratîk ditirse, lewma êrîşî herêmên ewle dike.  Zehra Mihemed her wiha da zanîn ku ew ‘‘Jiyana xwe bi azadî û aramî dewam dikin, em dagirkeriyeke Osmanî ya nû napejirînin.‘‘

Îda El-El-Elî ku dayika şehîdan e wiha axivî ‘‘Ev ax bi xwîn û têkoşîna zarokên me rizgar bûye, em dagîrkeriya Tirkiyê li herêmên rizgarkirî napejirînin.‘‘

Hinûd El-Mehmûd ku ew jî dayika şehîdan e da zanîn ku Hêzên Sûriya Demokratîk ew hêza bi tenê ye ku welatî parastin û aramî pêk anîn û got: ‘‘Na ji dagîrkeriyê re ku dixwaze xêrûbêrên herêmê bidizin û tevliheviyê di nava welatiyan de pêk bîne.‘‘

(k)

ANHA