Eşîrên Serêkaniyê gefên Tirkiyê nirxandin

HESEKÊ

Li ser daxwaza rûspiyên Ereb li bajarê Serêkaniyê îro civînek ji bo şîrovekirina rewşa siyasî û gefên Tirkiyê yên li ser herêmên Bakur û Rojhilatê Sûriyê, hate lidarxistin.

Civîn li Hola Mîtan a bajarê Serêkaniyê bi beşdarbûna bi dehan rûspiyên Ereb û nûnerên hin partiyên siyasî û Rêveberiya Xweser a Bakur û Rojhilatê Sûriyê pêk hat.

Civînê bi deqeyeke rêzgirtinê dest pê kir, paşê ji aliyê hevserokê buroya PYD`ê ya kantona Hesekê Ciwan Îso axaftinek hate kirin. Îso rewşa siyasî û aloziya Sûriyê şîrove kir û diyar kir ku ew parçeyeke ji aloziya Rojhilatê Navîn û ya cîhanê ye.

Îso wiha got: "Em bûyerên ku li herêmê rû didin dişopînin, em her tim dibînin ku çareseriyên ji bo Sûriyê ji aliyê hêzên herêmî û navneteweyî ve tên pêşniyarkirin, ne rast in û xizmeta berjewendiyên gelê Sûriyê nake, ji bo wê alozî hîna dewam dike. Her kes dizane ku ev şerê li herêmê kevn e û ev alozî bingeha şerê li ser desthilatdariyê ye.”

Îso da xuyakirin ku di nava şer û tevliheviyan de, li herêmên Bakur û Rojhilatê Sûriyê Rêveberiya Demokratîk li ser bingeha projeya neteweya demokratîk ku îradeya gelan bi hemû pêkhateyên wê bingeha çareseriyê ye û bidawîkirina şerê li herêmê ye, ji bo wê rastî gelek astengiyan û gefan tê, gefên Tirkiyê yên dawî yek ji wan e ku projeya demokratîk pûç bike.

Îso di dawiya axaftina xwe de bang kir ku divê her kes bi hev bigire û wiha got: “Em rê li ber pêkanîna gefên Tirkiyê bigirin û em bigihîjin Sûriyeyeke demokratîk ne navendî.”

Civîn hîna dewam dike.

(jo)

ANHA