'Efrîn bi hêza jina Efrînî wê rizgar bibe'

HESEKÊ / NESRÎN ELÎ

Têkildarî binpêkirinên artêşa Tirk a dagirker û çeteyên wê li Efrînê, jinên kantona Hesekê ji ajansa me re axivin.

Jina bi navê Nede  Elî Salih a ji navçeya Şedadê ya girêdayî kantona Hesekê got:"Gurupên terorîst hertim jinê ji ber ku ew beşek civakê ye,dikin hedef. DAIŞ'ê bi kiryarên xwe jin diçewisandin. Dagirkera Tirk heman kiryarî dike. Lê jina Efrînî; mîna zeytûn û axa xwe jinek berxwedêr e û ji bo welatê xwe şer dike."

Nede Elî Salih  tekez kir ku hemû jinên Bakurê Sûriyê dest ji Efrînê bernadin û dê li rex jinên Efrînê li berxwe bidin û wiha domand: "Efrîn her çi qas dem dirêj bike wê bi hêza jina Efrînî  rizgar bibe."

Ji aliyê xwe ve jina bi navê Hediye Mihemed a ji bajarê Hesekê bal kişand ku ew ê li hember dagirkera Tirk û hemû hêzên ku dixwazin destkeftiyên gelên herêmê têk bibin dê tê bikoşin û berdewam kir:"Em ê Efrîn ji dagirkeran rizgar bikin.”

Hediye wiha domand: "Erdogan behsa aştiyê dike, lê hovantirîn sûcên mirovahiyê der heqê gelê Efrînê de pêk tîne. Erdogan demografiya Efrînê diguhêre. Şêniyên Efrînê bi darê zorê ji malên wan derdixe. Mirovahî, edalet û rêxistinên mirovî ji binpêkirinên dagirkera Tirk li ku derê ne?."

Têkildarî heman mijarê jina bi navê Jiyan Ibrahîm a ji şêniyên navçeya herêma Serêkaniyê  destnîşan kir ku armanca êrîşa dagirkeran li ser Efrînê têkbirina projeya demokratîk a ku gelên Bakurê Sûriyê ji xwe kirine bingeh e û wiha got: "Efrîn dê rizgar bibe. Bi saya jina berxwedêr dê vegera xwediyên wê yên resen."

Ji zêdetirî 7 mehan ve û şêniyên Efrînê di bin konên kampên ku Rêveberiya Xweseriya Demokratîk ava kirine de berxwedana xwe didomînin. Ji aliyekî din ve artêşa Tirk a dagirker û çeteyên wê binpêkirinên xwe li dijî sivîlên li Efrînê didomînin.

(şx)

ANHA