Gelê Kobanê şehîd Rojhat oxir kirin

Bi sedan şêniyên Kantona Kobanê cenazeyê şervanê YPG′ê Ebdullah Hemdo (Rojhat Kobanê) li goristana Şehîd Dicle oxir kirin.

NÛÇE

12 gulan, 2018 17:35

KOBANÊ

Girseya gel cenazeyê şehîd wergirtin û ber bi goristana Şehîd Dicle ve ketin rê. Di merasîma oxirkirinê de endamên desteyên rêveberiya xweser, saziyên sivîl, şervanên YPG/YPJ′ê û Hêzên Asayîşê amade bûn.

Li goristanê merasîma oxirkirinê bi deqeyek rêz û toraneke leşkerî dest pê kir. Piştre Fermandarê YPG′ê Zerdeşt Kobanê axivî, şehîdên meha Gulanê û hemû şehîdên azadiyê bi bîr anîn. Zerdeşt soza domandina berxwedanê, şopandina riya şehîdan û parastina destkeftiyên wan da.

Hevseroka Meclîsa TEV-DEM′ê Eyşe Efendî jî soza domandina têkoşînê heta pêkanîna armancên şehîdan dubare kir û wiha domand, ″Wek dayîkên şehîdan, me biryara azadiyê da û di vê oxirê de bedelên giran da.″

Eyşe diyar kir ku pêjvajoya duyem a Berxwedana Serdemê bi hemû hêza xwe didome.

Piştre nasnameya şehîd hat xwendin, radestî malbata wî hat kirin û cenazeyê wî li goristanê di nava dirûşmeyên ″Şehîd namirin″ de hat veşartin.

(mm)

ANHA