ʹJi bo em têkoşînê xurt bikin, divê em xwe di fikrên Rêbertî de kûr bikinʹ

Rejîma Tirk a dagirker sîstema îşkence û qirkirinê li dijî Rêber Abdullah Ocalan ê ku li girava Îmraliyê ye didomîne. Ji bo têkbirina vê sîstemê şêniyên bajarokê Abra yê gundewarê bajarê Çilaxa yê kantona Cizîrê teqezî bi girîngiya şopandina fikrên Rêber Abdullah Ocalan û domandina têkoşînê da.

Welatiyê bi navê Husam Hisên berdewama siyasetên îşkence û qirkirinê li dijî Rêber Abdullah Ocalan şermezar kir û got: "Ew hewl didin di şexsê Rêbertî de gelan qir bikin û hêviyên wan ên ku bi saya fikrên Rêbertî hatine vejandin, vemirîne."

Hisên destnîşan kir ku ew van siyasetan red dikin û dê asta têkoşîna xwe bilind bikin û fikrên Rêber Abdullah Ocalan li Rojhilata Navîn û seranserî cîhanê belav bikin.

Welatiyê bi navê Zêdan Hisên diyar kir ku Rêber Abdullah Ocalan Îmralî veguherandiye jêdera fikir û felsefeyê. Hemû siyasetên rejîma Tirk a faşîst nikaribûn li hemberî hêza wî fikrî bisekinin.

Hisên destnîşan kir ku azadiya fîzîkî ya Rêber Abdullah Ocalan û bidawîkirina siyasetên îşkence û qirkirinê yên di şexsê Rêber Abdullah Ocalan de tên bikaranîn, bi bilindkirina asta têkoşînê û naskirina fikrên Rêber Abdullah Ocalan pêkan in.

Ezîme Rustem sîstema îşkence, qirkirinê û durûtiya hêzên navneteweyî û rêxistinên mafên mirovan şermezar kir û got: "Em van siyasetan qebûl nakin. Em ê heta pêkanîna azadiya fîzîkî ya Rêbertî têkoşînê bidomînin."

Ezîme Rustem diyar kir ku ew hewl didin bi rêya sîstema îşkence û qirkirinê gelan bê deng bikin û fikrên Rêber Abdullah Ocalan sînordar bikin û got: "Em êdî rastiya van planan dizanin, kes nikare me ji azadiya Rêbertî ya ku bi xwe azadiya jinan û gelan e, bi dûr bixe."

Di dawiya axaftina xwe de Ezîme Rustem teqezî bi girîngiya belavkirina fikrên Rêber Abdullah Ocalan û naskirina wan, da.

(mh)