Xebatên şaredariyên gel ên Girê Spî

Şaredariyên Gel ên kantona Girê Spî di çarçoveya plansaziya xwe ya îsal de gelek projeyên xizmetguzariyê pêk anîn û xebatên din didomîne.

Tev êrişan şaredariyên gel ên navçeya Eyn Îsayê, bajarokên Hîşe, Cirin û Silûkê hew didin beriya barîna baranê xebatên ku  ji beriya çend mehan ve dane destpêkirin, bi dawî bikin.

Di vê çarçoveyê de, şaredaryên gel ên bajarokê Cirin û Hîşe, ragar û rêyên girîng ên li gundên derdorê sererast kirin.

Şaredariya Gel li bajarokê Cirin ê rojavayê bajarê Girê Spî yê dagirkirî xebatên sererastkirina rêya Xan-Metîna bi dirêjahiya 11 kîlometreyan û sererastkirina 4 ragaran li gundin Bender Xan, Metîna, Qertal û Derb Hesen didomîne.

Şaredariya Gel a bajarokê Hîşe yê rojhilatê navçeya Eyn Îsayê ketina El Şêx Hesen-Hîşe bi dirêjahiya 850 metreyan sererast kir.

Her wiha Şaredariya  Gel a navçeya Eyn Îsayê sererastkirina rêya Hedriyat-Hîşe bi dirêjahiya 8 kîlometreyan didomîne.

Nivîsgeha Xizmetguzarî ya navçeya Silûkê ya dagirkirî jî, sererastkirina rêya Leqta -El Qesir di pêvajoya sêyemîn de bi dirêjahiya 10 kîlometreyan didomîne.

Hevserokê Komîteya Şaredariyan a Meclisa Kantona Girê Spî Mihemed Derwîş got: “Ji destpêka Cotmehê ve me gelek proje dane destpêkirin. Ev proje stratejîk in û dê gelek herêmên girêdayî kantonê sûdê jê digirin, nemaze ku êrişên dewleta Tirk a dagirker ên li ser herêmê dewam dikin."

Mihemed Derwîş anî ziman ku ew hewl didin projeyan di dema wan a diyar de û li gor girêbestên ku peyamgeran re îmze kirine, bi dawî bikin.

Hevserokê Komîteya Şaredariyan a Meclisa Kantona Girê Spî Mihemed Derwîş di dawiyê de destnîşan kir ku şaredarî dê xizmeta welatiyan bikin û hewl bide tevahî projeyan bi dawî bike.

(şx)

ANHA