Wêneya Cîhan Bîlgîn; ‘Kenê Serkeftinê’

Jina ciwan a 20 salî Ciwana Osê hestên xwe yên der barê mijarên mirovî û neteweyî de bi rengan tîne ser ziman û dibêje tabloya herî nêzî ruhê wê ye, wêneya şehîd Cîhan Bîlgin e.

Ciwana Osê ya ji taxa Şêxmeqsûd a Helebê, dibêje: “Şehîd Cîhan ji bo min çîrokeke serkeftinê ye, lewma min ew wek mijara tabloya xwe hilbijart. Ew bêyî dudilî wek rojnamevan tev li berxwedana Bendava Tişrînê bû û bû sembola îradeya jinên azad.”

Ciwanayê got: "Bi rêya vê tabloyê, min xwest kenên Cîhanê xêz bikim û min navê tabloyê kir ‘Kenê Serkeftinê'.”

Ciwanayê wiha dewam kir: "Her çend rewş li Sûriyeyê îro dijwar be jî, Cîhan û jinên mîna wê ku azadiyê dixwazin, derî ji bo jinan vekirine da ku bi xwe bawer bin û cihê xwe di hemû warên wekî çapemenî, huner, çand û leşkerî de bigirin.”

Her wiha Ciwanayê got: "Ez hêvî dikim ku her kes mafên xwe yên rewa bi dest bixe û wekhevî li ser bingeha rêzgirtina hevbeş di navbera zayendan de û di navbera hemû civak û olan de were pêkanîn."

Wek bersiva pirsa ku ger derfeta wê ya hevdîtina bi şehîd Cîhan re hebûya dê çi jê re gotiba, Ciwanayê got: "Ez ê jê re bibêjim ku wê erka xwe kiriye û hîn bêtir û têkoşîna wê bûye egera xurtkirina peyama jinên ciwan ên azad û serbixwe."

Nûçegihana ajansa me Cîhan Bîgîn di 19`ê Kanûna 2024`an de, dema ku berxwedana bendava Tişrînê dişopand, di encama bombebarana dewleta Tirk a dagirker de li gel rojnamevan Nazim Daştan şehîd bûbû.

(k)

ANHA