Salvegera damezirandina PYD’ê hat pîrozkirin

Partiya Yekitiya Demokratîk (PYD) bi boneya salvegera 22’yan a damezirandina xwe şahiyek li pêşiya hola meclisa bajarê Şedadê yê kantona Cizîrê li dar xist. Tevî endamên PYD’ê û saziyên sivîl, girseyek ji şêniyên Şedadê, Erîşe, Mergeda û Deşîşeyê beşdar bûn.

Ji rêveberên Meclisa PYD’ê ya bajarê Mergedayê Ehmed El Xedîr axivî û got: "Em vê rojê li tevahiya şêniyên Bakur û Rojhilatê Sûriyeyê û Rêber Abdullah Ocalan pîroz dikin. Em dikarin bêjin partiya me serkeftinên mezin bi dest xistine ku partiyên temenên wan sed sal e bi dest nexistiye. Partiya me gelek şehîd dane û bûye partiya şehîdan."

Ji rêveberên Meclisa PYD’ê ya kantona Cizîrê Ebdulxenî Oso jî anî ziman ku PYD êdî nûnertiya tevahiya civakên Bakur û Rojhilatê Sûriyeyê dike û got: "Partiya me di sala 2003’yan de di rewşên zehmet de dema zextên rejîma Baasê hat avakirin û ji bo tevahiya gelên Bakur û Rojhilatê Sûriyeyê destkeftiyên mezin bi dest xistin."

Di şahiyê de ji rêveberên Kongra Star a bajarê Erîşe Sûad El Ebdullah jî diyar kir ku PYD ku li ser esasê edalet, wekhevî û azadiya jinan ava bûy, roleke mezin di perwerdekirina civakê û parastina gel de lîst, her wiha mîsogeriya bingehîn a projeya neteweya demokraîtk li herêmê danî.

Pîrozbahî bi gerandina govendê bi dawî bû.

(bb)

ANHA