Li pêş nûnertiya NYˋyê êrişên dewleta Tirk hatin şermezarkirin

Gelek siyasetmedar, çalagerên siyas û rewşenbîrên Kurd li bajarê Qamişlo li pêş navenda Nûnertiya NYˋyê ya li Herêma Bakur û Rojhilatê Sûriyeyê protesto kir.

Di çalakiyê de êrişên bejahî û hewayî yên bênavber ên dewleta Tirk a dagirker û çeteyên wê li dijî Herêma Bakur û Rojhilatê Sûriyeyê û hedefgirtina binezasî û gelên herêmê hatin şermezarkirin.

Di çalakiyê de gelek peyamên mîna; "Divê Koalîsyona Navneteweyî êrişên barbarî yên dewleta Tirk rawestîne, yekitiya Kurdî bi yekitiya helwestê dibe û fedralî çareserî ye, sûcên dewleta Tirk ên dijî binesaziyan ên bi armanca biçîkirin û koçberkirinê rawestînin" hatin dayîn.

Di çalakiyê de siyasetmedar Hesen Salih axivî û got divê tevahî alî di nav de NYˋyê êrişên dewleta Tirk a dagirker û komên girêdayî wê rawestînin.

Salih anî ziman ku piştî hilweşîna rejîma Sûriyeyê dema hat ku tevahî Sûriyeyî û gelê Kurd mafên xwe wergirin.

Salih diyar kir ku dewleta Tirk a dagirker dixwaze hilweşîna Îran û Rûsyayê li Sûriyeyê fersend bigire û herêmên din ji Sûriyeyê dagir bike, demografiyê biguhere û siyaseta tirkkirinê bimeşîne.

Beşdaran di dawiyê de peyamek bi zimanê ingilîzî radestî nûnertiya NYˋyê kir.

Di naveroka peyamê de ev tişt tê gotin: "Em bang li sekreterê giştî yê NYˋyê, serokê Komîseriya Mafên Mirovan, Konseya Ewlehiyê û Koalîsyona Navneteweyî ya bi serkêşiya Amerîka û Fransayê dikin ku êrişên dewleta Tirk û çeteyên wê ku binesazî û sivîlan li herêmên Kurdan û xaka wan a dîrokî hedef digirin, rawestînin. Her wiha em banga bidawîkirina dagirkeriya Tirk ji tevahî xaka Sûriyeyê re bi taybet herêmên Kurdan li Efrîn, Serêkaniyê û Girê Spî dikin û bang dikin ku destwerdana li kar û barên hundirîn ên Sûriyeyê bidin rawestandin."

(fr)

ANHA