Li Kobanê Roja Rojnamegeriya Kurdî hat pîrozkirin

Bi boneya Roja Rojnamegeriya Kurdî Zanîngeha Kobanê çalakiyek li dar xist. Bi sedan xwedekar û şêniyên bajêr beşdarî çalakiyê bûn.

Piştî deqeyekê rêzgirtinê, Hevserokê Zanîngeha Kobanê Şervan Muslim axivî û ev roj li hemû rojnamevanan pîroz kir û got: "Ev roj di dîroka gelê Kurd de gaveke nû bû, ev gava danasîna çand û nasnameya Kurdî bû."

Hevseroka Peymangeha Bilind a Raghandinê ya Zanîngeha Kobanê Rûken Moro axivî û got:" Roja Rojnamegeriya Kurdî rastî derxist holê. Weke vê rojê ji aliyê Miqdad Midhed Bedirxan ve rojnameya Kurdistan derket. Em jî li Peymangeha Bilind a Ragihandinê dibêjin ku em ê heta dawiyê li pey doza gelê xwe bin û sal bi sal nifşên nû pêşwazî bikin."

Ji mamosteyên Peymangeha Bilind a Ragihandinê ya Zanîngeha Kobanê Elî Nebo li ser girîngiya vê rojê semînerek dan. Her wiha rojnamevanê Kurd Reşad Sorgul jî bi rêya videoyê tevlî panêlê bû û dîroka vê rojê nirxand.

Piştî panelê Zanîngeha Kobanê rojnamegerên kantona Firatê û têkoşerên ku di oxira vê pîşeyê de li kantonê canê xwe feda kirine, xelat kir û ew xelat radestî nûçegihana ajansa me Dilce Ehmed hat kirin. Dicle Ehmed jî got, ew ê heta dawiyê xwedî li mîrateya ragihandina azad derkeve û rêya heqîqetê bişopîne.

Di çalakiyê de wêneyên ku xwendekarên Peymangeha Bilind a Ragihandinê kişandibûn hatin pêşandan.

Çalakî bi stranên hunermendên  Navenda Baqî Xido ya Çand û Hunerê û gerandina dîlanê bi dawî bû.

(sş/k)

ANHA