Kurdistaniyên li Lubnanê spasiya Rêveberiya Xweser kir

Kurdistaniyên li Lubnanê spasname ji Rêveberiya Xweser re pêşkêş kir ji ber ku alîkariya şêniyên herêmê yên ji Lubnanê vedigerin kir.

Di nameyê de wiha hatiye nivisîn: "Em kurdistaniyên ku Lubnanê û sûriyeyiyên li wir, spasiya Rêveberiya Xweser dikin ku ji bo pêşwazîkirina pêkhateyên herêmên Bakur û Rojhilatê Sûriyeyê yên li Lubnanê, tedbîr girtin, herêmên ewle ji wan re peyda kir, pirsgirêkên wan ên li ser sînor çareser kir û welatiyên sûriyeyî gihandin herêmên xwe.

Em spasiya nûnerê Rêveberiya Xweser ê Lubnanê Ebdulselam Ehmed û hemû hevalên ku bi vî karî mirovî rabûne dikin."

Di encama aloziya leşkerî ya navbera Îsraîl û Hizbullahê de, bi deh hezaran sûriyeyiyên ji destpêka aloziya Sûriyeyê ve koçberî Lubnanê bûne, xwestin vegerin welatê xwe.

Nûnertiya Rêveberiya Xweser a li Lubnanê 24`ê Îlonê komîteyek ji bo şopandina kar û barên penaberên sûriyeyî yên ku dixwazin vegerin, ava kir.

Duh zêdetirî hezar û 300 sûriyeyî ji Lubnanê gihaştin kantona Reqayê.

Nûnertiya Rêveberiya Xweser a Lubnanê navên kesên dixwazin vegerin herêmê qeyd kirin û ew beş beş bi otobusan û bi "nîvê lêçûna rêwîtiyê" şandin herêmê.

(şx)