Ji bo bersivdana êrişên dagirkeriyê ciwanên Helebê tev li gerîlayan bûn

Li hember êriş û sûcên dewleta Tirk a dagirker ên li seranserî erdnîgariya Kurdistanê û ji bo bilindkirina asta têkoşînê û pêkanîna azadiya fîzîkî ya Rêber Abdullah Ocalan, 3 ciwanên ji taxa Şêxmeqsûd a Helebê îro tev li gerîlayên HPG'ê bûn. Ev tevlêbûn di şevbuhêrka ji bo şermezarkirina êrişên dagirkeriyê de pêk hat.

27 kanûn, 2023 22:21

HELEB

Di çarçoveya piştgiriya ji bo berxwedana Rêber Abdullah Ocalan û pêngava "Ji Abdullah Ocalan re azadî, ji pirsgirêka Kurd re çareseriya siyasî" de, Tevgera Hîlala Zêrîn a Helebê şevbuhêrkek li kafîteryaya Telêt Heleb a taxa Şêxmeqsûd a Helebê li dar xist.

Di şavbuhêrkê de koma Çiyayê Hawar a Navenda Çand û Hunerê ya Cemîl Horo, koma şehîd Vejîn a Tevgera Hîlala Zêrîn stranên li ser Rêber Abdullah Ocalan û fikrên wî gotin.

Di şevbuhêrkê de ji bo bersivdayîn êrişên qirkirinê yên dewleta Tirk a dagirker ên li tevahiya erdnîgariya Kurdistanê, 3 ciwanên ji taxa Şêxmeqsûd tevlêbûna xwe li nava Hêzên Parastina Gel (HPG) û destpêkirina têkoşînê li çiyayên Kurdistanê ji bo pêkanîna azadiya fîzîkî ya Rêber Abdullah Ocalan, ragihand.

Ciwanan navên xwe şoreşgerî "Hemze", "Karker" û "Welat" hilbijartin û siloganan banga seferberiya giştî li hember dagirkeriyê û hesabxwestinê, hildan.

(mh)

ANHA