Hêzên Ewlekariya Hundirîn bi gel re civiyan

Hêzên Ewlekariya Hundirîn ên Bakur û Rojhilatê Sûriyeyê li hola Navenda Çand û Hunerê ya Sirînê civînek ji gel re li dar xist. Di civînê de bi sedan endamên sazî û dezgehên girêdayî Rêveberiya Xweser û endamên Hêzên Ewlekariya Hundirîn amade bûn.

Civîna bi armanca guhdarîkirina li rexneyên gel û daxwazên wan bi deqeyeke rêzgirtin dest pê kir. Piştre ji rêveberên Nivîsgeha Têkiliyên Giştî ya Bakur û Rojhilatê Sûriyê Dûran Haşimî axivî û got: "Armanc ji civînên ku em li her kantonê li dar dixin ew e ku em xwe bighînin gelê xwe û li gorî wê em kar û barê xwe xurttir bikin. Gelê me jî rexneyên xwe dike û em jî li gorî wan rexneyan tev digerin û xwe ji nû ve saz dikin. Gelê me ne tenê rexne lê xwestekên xwe jî tînin ser ziman, ew jî pêşketina karê Asayîşê ye. Em daxwazên wan dikin rapor û ji Rêveberiya Giştî ya Asayîşê re dişînin. Em jî ji bo gelê xwe her amade ne."

Beşdaran jî nêrîn û pêşniyarên xwe anîn zimanê. Hate gotin divê li ber belavbûna çekan û ajotina motorsîklêtan ji aliyê zarokan ve were girtin, teqandina guleyan di şahiyan de were astengkirin. Piştî wê jî pêşniyar hatin raporkirin.

(sş/bb)

ANHA