Çalakiyên 8’ê Adarê dewam dikin

Li Bakur û Rojhilatê Sûriyê çalakiyên 8’ê Adarê Roja Jinan a Cîhanê di 23'yê Sibatê de dest pê kirin û heta 10'ê Adarê bi dirûşma "Bi hev re em ê şoreşa xwe biparêzin û axa xwe rizgar bikin" dê dewam bikin.

DÊRIK

Komîteya Çalakiyan a Desteya Perwerdeyê a navçeya Dirkê ji bo xwendekarên Dibistana Navîn a Keçan a Şehîd Şervîn li Navenda Dîcle ya Çand û Hunerê çalakiyek li dar xist.

Di çalakiyê de xwendekarên Dibistana Şehîd Şervîn, kadroyên perwerdeyê, rêveberiya Desteya Perwerdeyê û rêveberiyên dibistanê amade bûn.

Di çalakiyê de ji rêveberên dibistanê Diyele Meşo têkoşîna jinan a di nava Tevgera Rizgariya Kurdistanê û şoreşa Bakur û Rojhilatê Sûriyê de nirxand.

Diyele Meşo bal kişand ser dîrok û têkoşîna jinan, bi taybet jinên têkoşer ên Bakur û Rojhilatê Sûriyê û 8’ê Adarê li hemû jinên cîhanê pîroz kir.

Piştre sînevîzyonek li ser dîrok û têkoşîna jinan hate pêşkêşkirin.

KOBANÊ

Li bajarê Kobanê bi dehan şêniyên bajêr şahiyek li dar xist. Şahî ji aliyê Meclisa Jinan a Partiya Sûriya Pêşerojê ve li daristana Kobanê ya hate lidarxistin.

Piştre li ser navê Meclisa Jinan a Partiya Sûriya Pêşerojê ya navçeya Kobanê daxuyaniyek hate dayîn û kiryarên ku ji aliyê rejîmên faşîst û sîstema baviksalar ve li ser jinan hatine meşandin, hatin şermezarkirin.

Di daxuyaniyê de wiha hate gotin: "Di vê qonaxa dîrokî de û bi ruhê berxwedana jinan em 8'ê Adarê pêşwazî dikin, di demekê de ku jiyana jinan tu carî ne hêsan bû û heta niha jî bi her tundî û zordariya zîhniyeta baviksalar û kapîtalîst pê re rû bi rû ne.”

Di dawiya şahiyê de xwarinên gelêrî yên Kobanê li beşdaran hatin belavkirin û şanoyek ji aliyê Koma Hîlala Zêrîn a Navenda Çand û Hunerê ya Sirînê ve hate pêşkêşkirin.

HESEKÊ

Di çarçoveya çalakiyên 8'ê Adarê de, Kongra Star li bajarê Hesekê îro dest bi xemilandina meydan û kolanên sereke yên bajêr kir.        

REQA

Meclisa Jinan a Partiya Sûriya Pêşerojê bi koordîneya Nivîsgeha Kombûna Jinan a Zenûbiya, îro li navenda Kombûna Jinan a Zenûbiya ya Reqayê, semînerek li ser da.

Bi dehan endamên saziyên sivîl û leşkerî yên Reqayê, Partiya Sûriya Pêşerojê û Kombûna Jinan a Zenûbiya beşdarî semînerê bûn.

Ji rêveberên Nivîsgeha Kombûna Jinan a Zenûbiya Emîne El-Salih destnîşan kir ku bi şoreşa Rojava û Bakur û Rojhilatê Sûriyê re derketiye holê ku jin pêşengiya vê şoreşê dikin û jinan hêza xwe ya pêşeng nîşan da.

Piştre sînevîzyoneke têkildarî xebatên jinan ên aborî û siyasî yên li Bakur û Rojhilatê Sûriyê hate pêşkêşkirin.

Berdevka Nivîsgeha Jinan a Partiya Sûriya Pêşerojê Nehle Îsmaîl jî got jin bi erkên rêveberiyê rabûn û hebûna xwe di hemû astên îdarî û siyasî de îspat kir û heta niha jî têkoşîna xwe û parastina destkeftiyên xwe didomînin.

(dx)

ANHA