Komîteya Jineolojiyê dewreyeke perwerdeyê vekir

KOBANÊ

Komîteya Jineolojiyê bi armanca pênasekirina rola jinan di nava Şoreşa Rojava û rihê komînal de, her wiha rola jinan di nava civakê de li ser çemê Firatê yê li Kobanê ya Herêma Firatê 6 kon vekirin. Di van konan de 40 jinên ciwan ku 2 ji wan jinên enternasyolîst in, tev li dewreya perwerdeyê bûn. Dewre ji 26'ê Hezîranê ve hatiye destpêkirin.

Endama Rêveber a Komîteya Jinên Ciwan a Bakurê Sûriyeyê ku li ser dewreya enternasyonal disekine Tişîta Kendalî diyar kir ku armanca wan a sereke ji dewreyê ew e ku jinên ciwan jineolojiyê nas bikin û wiha dom kir: "Ciwan pêşengên şoreşê ne, em bi rêya van dewreyan hewl didin rihê komînal di nava ciwanan de ava bikin."

Ev dewreya duyemîn e ku Jineolojî li Rojava vedike. Beriya niha dewreyek li gundê Jinwar ê li herêma Dirbêsiyê ya kantona Hesekê ya Herêma Cizîrê hate vekirin. Lê ev dewreya niha li ser asta Bakurê Sûriyeyê hatiye vekirin. Dewre bi dirûşma "Em ê asta berxwedana jinan li Efrînê bilind bikin, dê jinên cîhanê li dijî faşizmê serî hildin" pêk hat.

Di dewreyê de jinên ciwan dersên bîrdozî û leşkerî jî dibînin, dersên der barê dîroka tevgera jinan de li cîhanê, rastiya jinan, jineolojî, jiyana hevbeş û rastiya Serokatiyê dê werin dayîn. Di dewreyê de her wiha dê dersên li ser bikaranîna çekan jî were dayîn. Her wiha dê jin fêrî melevanî (avjenî) û ajokariya erebeyan jî bibin.

Li gorî bernameya perwerdeyê dê ders saet 07.00'an dest pê bikin û saet di 16.00'an de bi dawî bibin. Dewre dê 8 rojan berdewam bike.

ANHA