127 kes ji kampa Holê derketin

Rêveberiya Kampa Holê 127 kesên dixwazin vegerin warên xwe, ji kampê derxistin û ber bi bajarên wan ve bi rê kirin.

ROJANE

30 tîrmeh, 2025 13:47

HESEKE

Rêveberiya Kampa Holê ya kantona Cizîrê bi hevkariya Komîseriya Kar û Barên Koçberan a NYˊyê îro komeke ji 127 kesan pêk tê ji kampê derxist û ber bi herêmên wan ve bi rê kirin.

Di komê de 127 kes hene û ber bi herêmên wan ên li Reqa, Heleb û Idlibê hatin rêkirin.

Derxistina vê komê bi hevkariya Desteya Kar û Barên Civakî ya Rêveberiya Xweser, Navenda Sûriyeyê ya Lêkolînan û bi amadebûna nûnerên Desteya Têkiliyên Derve ya Rêveberiya Xweser, pêk hat.

Ev gav, di çarçoveya pabendbûna Rêveberiya Xweser bi misogeriya vegera ewle û birûmet a ji bo kesên dixwazin vegerin cihên xwe de, pêk tê.

Beriya ev kom bi rê bikeve, aliyên di vê yekê de amade, rêkeftineke fermî ku tê de bend û mekanîzmayên hevkariyê hene, îmze kir.

Der barê mijarê de serokê Nivîsgeha Kar û Barên Koçberan a Herêma Bakur û Rojhilatê Sûriyeyê Şêxmûs Ehmed anî ziman ku Rêveberiya Xweser hewlên vegerandina tevahî kesên dixwazin vegerin cihê xwe didomîne û got tu bersivek ji aliyê hikumeta veguhêz a Sûriyeyê ve tune ye ku karê sûriyeyiyan dixwazin vegerin herêmên xwe hêsan bike.

(fr)

ANHA