’Em li vir in, em li ber xwe didin’

Bertkên li dijî êrişên dewleta Tirk a dagirker zêde dibin. Yekitiya Cotkaran û Kedkaran a Kantona Firatê daxuyaniyek li ber avahiya Odeya Pêşesaziyê ya Kantona Firatê ya li bajarê Kobanê da. Hevserokê Yekitiya Cotkaran a Kantona Firatê Mistefa Walî daxuyanî xwend. Heman daxuyanî li bajarokê Esediyê yê Kantona Reqayê ji aliyê hevserokê Yekitiya Cotkaran a Kantona Reqayê Ehmed El Hemûd ve hat xwend.

Di daxuyaniyê de hate diyarkirin ku êrişên li dijî binesazî û qada aborî binpêkirina qanûnên navneteweyî ne  û hate gotin: "Em cotkar dev ji xak û rûmeta bernadin. Em ê heta mirinê li ser xaka xwe bin. Em zulmê û heqaretê qebûl nakin."

Xebatkarên tenduristiyê yên Kantona Efrîn û Şehbayê daxuyanî da. Ji rêveberên Nexweşxaneya Avrîn Stêrvan Mihemed bi zimanê kurdî û Cemîl Cemo bi zimanê erebî daxuyanî xwend.

Di daxuyaniyê de êrişên dewleta Tirk a dagirker û bêdengiya civaka navneteweyî ya li hemberî êrişan hatin şermezarkirin. Hate gotin ev êriş sûcên şer in û armanc jê vejandina DAIŞ’ê ye.

ŞEHBA

Endamên Komeleya Stêrk a Parastin û Şopandina Zarokan a Kantona Efrîn û Şehbayê jî daxuyaniyek  li ber avahiya xwe ya li navçeya Ehdasê ya Şehbayê da. Rêveberên komeleyê Nebîha Hec Îbrahîm bi zimanê erebî û Cîlan Silêman bi zimanê kurdî daxuyanî xwend. Di daxuyaniyê de hate diyarkirin ku dewleta Tirk a dagirker êrişên xwe li ser tevahî herêmên Rêveberiya Xweser didomîne û hate gotin, êriş dibin sedema kuştin û êşên zarokan.

MINBIC

Meclisa Malbatên Şehîdan a Kantona Minbicê daxuyanî da. Daxuyanî li ber avahiya meclisê ji aliyê hevserokê meclisê Rebîh Hemade ve hat xwendin.

Di daxuyaniyê de banga hevgirtinê li pêkhateyên Bakur û Rojhilatê Sûriyeyê hat kirin. Her wiha banga piştevaniyê bi hêzên parastinê û xwedîderketina li mîraseya şehîdan hat kirin.

Rêxistinên Civaka Sivîl  ên li kantona Minbicê jî daxuyanî  li naverasta bajarê Minbicê da. Daxuyanî bi beşdarbûna endamên Yekitiya Mamosteyan, Yekitiya Rewşenbîran, Komeleya Tirkeman, Komeleya Çerkez, Yekitiya Parêzeran û Yekitiya Endazyaran ji aliyê hevseroka Komeleya Tirkmen Nadiya Milhim ve hat xwend.

Di daxuyaniyê de êrişên dewleta Tirk a dagirker hatin şermezarkirin û hate diyarkirin ku ev êriş bêçarebûna dewleta Tirk a dagirker nîşan dide.

Di daxuyaniyê de banga xurtkirina hevgirtinê û parastina destkeftiyên şoreşê li tevahî pêkhateyên herêmê hatin kirin.

KOMBÛNA JINAN A ZENÛBIYA

Kombûna Jinan a Zenûbiyayê der barê êrişan de daxuyaniyeke nivîskî weşand.

Di daxuyaniyê de hate gotin: "Dewleta Tirk a dagirker bi êrişên xwe yên li ser herêmê hewl dide şoreşa me ya jinan û projeya me ya demokratîk têk bibe. Her wiha hewl dide şeran derxe û ewlehiya herêmê têk bibe. Bi êrişa li ser girtîgeha Sînaayê ya li Hesekê jî armanc dike DAIŞ a terorîst zindî bike."

Di daxuyaniyê de sûcên dewleta Tirk ên li ser gelê herêmê hat şermezarkirin û banga li rêxistinên hiqûqî û mirovî yên navneteweyî hate kirin û hesab ji dewleta Tirk bipirsin.

TEBQA

Bi sedan şêniyên kantona Tebqayê jî bi meşeke girseyî dewleta Tirk a dagirker şeremzar kirin. Meşa ku nûnerên partiyên siyasî, nûnerên Rêveberiya Xweseriya Demokratîk a Herêma Bakur û Rojhilatê Sûriyeyê û rûspiyên eşîran  tev lê bibûn ji taxa Ewel (Yekem) dest pê  kir û li Çerxerêya  Hadirî ya taxa Sanî (Duyem) bi dawî bû. Di meşê de dirûşmên silavkirina bexwedana QSD’ê û şermezarkirina dewleta Tirk a dagirker hatin berzkirin.

Li Çerxerêya Hadirî deqeyeke rêz hat girtin. Welatiyê bi navê Omer Seran daxuyanî  bi navê şêniyên kantona Tebqayê xwend.

Di daxuyaniyê de bêdengiya hêzên navneteweyî ya li hemberî êrişên dewleta Tirk a dagirker hat şermezarkirin û banga piştgiriya bi QSD’ê re hate kirin.

Meclisa Malbatên Şehîdan a Kantona Tebqayê daxuyaniyek li qada avahiya meclisê da. Daxuyanî bi amadebûna nûnerên Rêveberiya Sivîl a Demokratîk a Kantona Tebqayê û malbatên şehîdan ji aliyê rêveberê Nivîsgeha Komîteya Lihevanînê ya Meclisa Malbatên Şehîdan Mihemed Subhî Şêx ve xwend xwendin.

Di daxuyaniyê de hate destnîşankirin ku piştî QSD’ê herêmê ji terora DAIŞ’ê rizgar kirin, dewleta Tirk binesaziyên petrol, bendav, nexweşxane, dibistan, qadên çandiniyê û cihên îbadetê dike hedef. Hate diyarkirin ku ev êriş dide nîşandan ku dewleta Tirk dixwaze tola DAIŞ hilîne.

Di daxuyaniyê de bêdengiya hêzên navneteweyî ya li hemberî êrişan hat şermezarkirin û hate gotin: "Em bi xak û rumeta xwe ve girêdayî ne, em ê li hemberî êrişan bisekinin."

REQA

Li Reqayê jî daxuyaniyek ji aliyê Partiya Sûriyeya Pêşerojê, PYD, Partiya Kesk a Kurdistanê, Partiya Muhafizkaran, Partiya Hevbendiya Nîştimanî, Partiya Çep a Kurd û Partiya Avakirin û Pêşxistin ve hate dayîn. Daxuyanî li Qada Jina Azad a li bajarê Reqayê ji aliyê cîgira seroka Meclisa Jinan a Giştî ya Partiya Sûriyeya Pêşerojê Henan Mihemed ve hat xwend.

Di daxuyaniyê de êrişên dewleta Tirk a dagirker hatin şermezarkirin û hate gotin ev êriş mîna ragihandina şerekî topyakunê li dijî gelê Herêma Bakur û Rojhilatê Sûriyeyê ye.

Di daxuyaniyê de bang li aliyên têkildar hat kirin ku hesab ji dewleta Tirk bipirsin.

ŞEDADÊ

Li navçeya Şedadê ya başûrê Hesekê jî meşek hat lidarxistin. Bi sedan şêniyên Şedadê û navçeyên Mergeda, Erîşa û Deşîşe beşdarî meşê bûn. Meş ji ber avahiya Navenda Tevgera Ciwanên Şoreşger a Sûriyeyê dest pê kir. Di meşê de pankartên bi nivîsên şermezarkirina dewleta Tirk a dagirker û wêneyên deverên ku hatine bombebarankirin hatin vekirin.

Meş li ber Parka Rêbertî veguherî mîtîngê. Li vir deqeyeke rêz hat girtin, piştre endamê Meclisa Kantona Cizîrê Farûq Tozo axivî û got: "Em li vir in da ku berketa xwe ya li hemberî kirinên hêzên Tirk ên faşîst ku li ber çavê cîhanê li djiî gelê me tê kirin nîşan bidin. Tirkiye şerê debarê dike, firin, kargeh û çapxaneyan û tevahî rêbazên jiyanê dike hedef."

Endama Kongra Star a Hesekê Erîc El Yesarî got, bêdengiya hêzên navneteweyî ya li hemberî êrişên dewleta Tirk a dagirker nîşan dide ku ew jî şirîkê dewleta Tirk in.

Erîc El Yesarî bang li civata navneteweyî kir ku li hemberî êrişên li ser Herêma Bakur û Rojhilatê Sûriyeyê erkê xwe bi cih bîne.

Mîtîng bi berzkirina dirûşman bi dawî bû.

HELEB

Bi heman armancê daxuyaniyek ji aliyê Meclisa Tenduristiyê ya Taxên Şêxmeqsûd û Eşrefiyê yên Helebê ve hat dayîn. Daxuyanî bi beşdarbûna bi dehan xebatkarên tenduristiyê ji aliyê rêveberê Nexweşxaneya Şehîd Xalid Fecir Mihyedîn Hemo ve hat xwendin.

Di daxuyaniyê de bal hat kişandin ser armancên dewleta Tirk a dagirker ji êrişên li ser Bakur û Rojhilatê Sûriyeyê û hate gotin: "Bi êrişên li ser navendên xizmetan, binesazî û qadên sivîlan armanc dike tevahî rêbazên jiyanê tune bike, Rêveberiya Xweser lawaz bike, tirsê di nava şêniyan de belav bike da ku wan neçarî koçberiyê bike û di encamê de herêm vala bibe. Di heman demê de berdewama êrişan tê wateya zindîkirina DAIŞ’ê, da ku careke din kuşt û terorê li herêmê bike."

 (bb)

ANHA