Dayikên gerîlayan berxwedana zarokên xwe silav kir

Dayika gerîlaya YJA Starê Stêrvan Rojava, Zehra Mûsa berxwedana gerîlayan a li hemberî êrişên artêşa Tirk a dagirker silav kir. 

Zehra Mûsa bi van gotinan bertek nîşanî tevkariya hêzên PDK’ê ya bi artêşa dagirker re da: “Ne ji gerîla bûya tiştek bi navê PDK’ê nedibû. PDK bûye alav di destê dewleta Tirk a dagirker de. Dewleta Tirk her carê wê ji bo armanc û planên xwe bi kar tîne.”

Zehra Mûsa got serkeftin dê para gerîla be û wiha domand: “Em li ser gerîla natirsin. Serkeftin dê para me be. Dîrok şahida serkeftina gerîlayên azadiyê ya li hemberî dewleta Tirk a dagirker û hevkarên wê ye. Ev ne cara yekemîn e dewleta Tirk hewl dide gerîla têk bibe, lê her carê têk diçe."

Dayika gerîlayên YJA Star Bêrîtan Rojhilat û Dorşîn Rojhilat, Zîlan Mihemed jî got: "Ne ji berxwedana gerîla bûye hebûna me tune bû. Gerîla hêza yekane ye ku bi bawerî û israr parastina gelan ji êriş û planên pergalên serdest dike.”

Dayika gerîlayê HPG’ê Gerîla Serêkaniyê Zubeyda Bozo anî ziman ku dewleta Tirk a dagirker bi êrişên xwe yên li ser gerîla hewl dide gelan qir bike û koçber bike.

Zubeyda Bozo bal kişand ser tevkariya PDK’ê û dewleta Tirk a dagirker û wiha got: "Divê PDK baş bizane ku dê dewleta Tirk rojekê dest jê berde."

(bb)

ANHA