Amûdê şehîdên Berxwedana Rûmetê oxir kirin

Bi sedan şêniyên navçeya Amûdê ya kantona Qamişlo ya Bakur û Rojhilatê Sûriyê, cenazeyên şervanên QSD`ê Mihemednûr Abdullah(Sason), Amar Fars(Îrîş Amûdê)li Goristana Şehîd Îsmaîl a li navçeyê oxir kirin. Her du şervan di 18`ê Cotmehê de li bajarê berxwedanê, bajarê Serêkaniyê şehîd bûne.

Girseya gel tevî şandeyên ji Rêveberiya Xweser a Bakur û Rojhilatê Sûriyê û saziyên civaka sivîl, cenazeyên şervanan ji Navenda Meclisa Malbatên Şehîdan wergertin û ber bi Goristana Şehîd Îsmaîl ve çûn.

Li goristanê merasîm bi bîranîna cangoriyên azadiyê hate destpêkirin. Paşê, ser navê Meclisa Zagonsaz a herêma Cizîrê hevserokê meclisê Hisên Ezam axivî û got Hêzên Sûriya Demokratîk(QSD) tekane hêza parastina herêmê dikin, her wiha dikarin li dijî artêşa Tirk li ber xwe bidin.

Piştî axaftin bi dawî bû, nasnameya her 2 şehîdan ji aliyê Meclisa Malbatên Şehîdan ve hatin xwendin û radestî malbatan hate kirin. Şehîd Mihemednûr Abdullah û Amar Faris di nava sloganên"Bijî berxwdana QSD`ê, berxwedan jiyan e" hatin veşartin.

(eh)

ANHA