Fîdan Dogan li ser gora xwe hat bibîranîn

Fîdan Dogan ku li Parîsê hatibû qetilkirin bi merasîmekê li ser gora xwe hat bibîranîn.

9 ÇILE, 2023 12:42

NAVENDA NÛÇEYAN

Ji şehîdên Komkujiya Yekemîn a Parîsê, Nûnera Kongreya Neteweyî ya Kurdistanê (KNK) ya Parîsê Fîdan Dogan li ser gora xwe ya li Taxa Xopon a Elbistan a Mereşê hat bibîranîn.

Berdevka Partiya Demokratîk a Gelan (HDP) Ebrû Gunay, endamên Meclisa Jinan a HDP’ê, parlamentera HDP’ê ya Rihayê Ayşe Surucu, endamên Meclisa Dayikên Aştiyê û aktîvîstên Tevgera Jinên Azad (TJA) tev li merasîma bîranînê bûn.

Berdevka HDP’ê Ebrû Gunay di merasîmê de axivî, şehîdên komkujiya yekemîn a Parîsê, Sakîne Cansiz, Fîdan Dogan û Leyla Şaylemez bi bîr anîn û got: ʹʹDewlet çiqas qirêjî dibin bila bibin lê nikarin xwe li pêşiya jinên ku biryara berxwedanê dane bigirin. Zû yan jî dereng ev heqîqet teqez dê derkeve holê û faîlên wan her sê jinên Kurd hesabê bidin.

Piştî axaftinan jî girseyê dirûşmên “Şehîd namirin” û “Jin, jiyan, azadî” berz kirin. Piştre jî beşdaran şalên mor û qurnefîl danîn ser gora Dogan û bîranîn bi dawî bû.