Şehîdên meha Cotmehê hatin bi bîranîn

Meclisa Malbatên Şehîdan a Qamişloyê merasîmê bîranîna 138 cangoriyên meha Cotmehê li Goristana Şehîd Delîl Saroxan li dar xist.  Malbatên şehîdan, endamên saziyên sivîl, rêxistinên jin û ciwanan jî di nav de,  gelek kes beşdarî merasîmê bûn.

Merasîm bi deqeyeke rêzgirtin dest pê kir. Piştre endamê TEV-DEM′ê Dijwar Axa axivî û li ser meha Cotmehê got: "Ev me ji bo me meheke xemgîn e, di heman demê de meheke pîroz e. Di vê mehê de komploya navneteweyî li dijî Rêber Abdullah Ocalan pêk hat. Serêkaniyê û Girê Spî di vê mehê de hatin dagirkirin û yasîma Partiya Sûriyeya Pêşerojê Hevrîn Xelef şehîd bûn. Her wiha karwanek şehîd bûn ku va me wan bi bîr tînin.′′

Dijwar Axa bal kişand ku jiyana azad berhema keda şehîdan e û got: "Ev leheng di oxira ku em bi hev re azad bijîn û di oxira ku her yek ji me bi awayekî demokratîk bi zimanê xwe biaxive, şehîd bûn. Berdêla şoreşê gelekî buha ye, berdêla wê xwîna keça û xortan e ku bi saya wan me şoreşa xwe ya exlaqî û mirovî gihand vê astê. Hemû şehîd di dilê me de ne. Bi sedan kes çeka şehîdan radikin û didin ser şopa wan."

Dijwar Axa gotina Rêber Abdullah Ocalan bi bîr anî û got: "Şehîd pêşengên me yên manewî ne. Tevgera me ji bo rakirina tola şehîd Hakî Karer ava bûye. Em ê têkoşîna şehîdan bidomînin."

Piştî axaftinan nasnameyên 138 şehîdan hatin xwendin. Merasîm bi tîlîliyên dayikan û nîşaneyên serkeftinê bi dawî bû.

(bb)

ANHA