Li Tebqayê projeya çandina 10 hezar dar

Desteya Jîngehê ya kantona Tebqayê di çarçoveya projeya wê ya çandina 10 hezar dar de, hezar û 100 dar çandin. Ji bo hefteya bê jî amadekariya çandina 500 daran tê kirin.

CIVAK Û JIYAN

5 adar, 2024 04:34

TEBQA

Di çarçoveya projeyên 2024'an de Desteya Jîngehê ya Rêveberiya Xweseriya Demokratîk a kantona Tebqayê ya Herêma Bakur û Rojhilatê Sûriyeyê de, di 14'ê Çileya îsal de însiyatîfek ji bo çandina 10 hezar dar di parastgeha Green û deverên cuda yên kantonê de da destpêkirin. Ev hemleya yekemîn a çandina daran li kantonê ye.

Desteyê di serî de 600 şitilên daran li parastgeha Green çandin û hîna xebatên wê yên projeyê didomin.

Hevserokê Desteya Jîngehê ya kantonê Cemal Ebdulletîf da zanîn ku di qonaxa duyemîn a projeyê de desteyê 500 şitilên nû yên daran çandin û dê li heman parastgehê hefteya bê 500 şitilên din biçîne.

Şitilên ku tên çandin cûr be cûr in.

Deste di vê demê de hewl dide bi rêya danîna boriyên avdanê û tûrbînan avê ji bo daran peyda bike. Her wiha cihên din ji bo çandinê tên amadekirin.

Hejmara giştî ya darên ku hatine çandin hezar û 100 e.

(mh)

ANHA