Deriyê di navbera Îran û Iraqê de vebû

Serokê Desteya Deriyên Sînorî yên Iraqê Omer Waîlî, derbarê vekirina deriyê Şêb û girtina deriyê Mendelî de daxuyaniyek belav kir.

Di daxuyaniyê de hat diyar kirin ku ji saet heştê sibeha îro ve, deriyê sînorî yê Şêb li pêşberî bazirgan û şofêran hatiye vekirin.

Waîlî destnîşan kir ku di 13’ê vê mehê de deriyê Mendelî dê bi awayekî demkî were girtin. Ev pêngav bi armanca temamkirina karên teknîkî û amadekariyên çêkirinê pêk tê; bi taybetî bi nêzîkbûna werza baranê û rewşa avhewayê re ku bandorê li ser çûnûhatina wesayîtan û karên di hundirê deriyê sînorî de dike.

Her wiha eşkere kir ku ev tedbîr di çarçoveya plana desteyê de ne ji bo amadekirina deriyên sînorî û çareserkirina pêdiviyên teknîkî û xizmetguzariyê, bi awayekî ku berdewamiya karên wan bi rêkûpêk û ewle dabîn bike. Dema vekirina deriyê Mendelî jî dê piştî bidawîbûna karên pêwîst bi daxuyaniyekê were ragihandin.

Hêjayî gotinê ye ku deriyê Şêb ê li sînorê parêzgeha Mîsanê di 21’ê meha borî de bi awayekî fermî hatibû girtin. Hikûmeta Iraqê ragihandibû ku girtina deriyî ji ber qaçaxçîtiya drav û dermanan bûye. Ji wê demê heta duh jî welatiyên parêzgehê xwepêşandan li dar dixistin û daxwaza vekirina derî dikirin.