Ciwanên malbatên şehîdan piştgirî dan hêzên parastinê

Bi dehan ciwanên malbatên şehîdan ên bajarê Qamişlo li çerxerêya Şehîd Yûsif Gulo kom bûn û daxuyanî da. Di daxuyaniyê de piştgiriya xwe bi QSD'ê re li hemberî êriş û gefên Tirkiyê re nîşan da.

Daxuyanî bi zimanê kurdî û erebî ji aliyê Şirîn Ehmed û Jiyan Hisên ve hat xwendin.

Di destpêka daxuyaniyê de salvegera 10'emîn a Şoreşa 19'ê Tîrmehê hat pîrozkirin û hate gotin ev şoreş bûye modela biratiya gelan û bingehê avakirina Sûriya pêşerojê ji bo tevahî pêkhateyan.

Di daxuyaniyê de soza şopandina xeta şehîdan û fikirê rêber Abdullah Ocalan hate dayîn û hate gotin: "Ji bo azadiya rêbertî ji dijminê ku li hemberî berxwedana rêbertî û gerîlayên leheng têk çûye, em ê bi hemû rêbazan û îmkanên xwe kar bikin."

Ciwanên malbatên şehîdan bang li her kurdekî li derveyî welat kir ku erkên xwe yên dîrokî pêk bînin, li hembêza welat vegerin û parastin wê bikin heta ku dijmin were têkbirin û destkeftiyê dîrokî werin bidestxistin.

Her wiha bang li hemû saziyên demokrat ên ciwanan ên li cîhanê hate kirin ku li kêleka doza wan a adil bin û destekê bidin tecrûbeya Rojava ya pêşeng, êrişên Erdogan û çeteyên wî yên li ser herêmê têk bibin û hate gotin: "Em keç û xortên Rojava bi hemû netewe û mezhebên xwe refa xwe dikin yek û li eniyên pêşîn bi hêzên xwe yên leşkerî re bin heta ku serkeftin pêk were."

ANHA