Ji ber êrişên li ser Şehbayê sewal telef bûn

Artêşa Tirk a dagirker û çeteyên wê vê sibehê gundê Hescak û Um El-Qura yên kantona Şehbayê dan ber topan. Di van êrişan de zeviyên çandiniyê û pezên welatiyan bûn hedef.

Şêniyê bi navê Mihemed Casim ê ji gundê Um El-Qura ku şivantiyê dike got: "Seat derdora 7'ê Sibeha bû, min pezê xwe diçêrand, artêşa Tirk a dagirker û çeteyên wê dest bi topbarankirina herêmê kir û pez jî bûn hedef."

Casim diyar kir ku di topbaranê de 4 mîh telef bûn û gelek birîndar bûn.

Casim destnîşan kir ku şêniyên herêmê di radeya yekemîn de xwe dispêrin xwedîkirina sewalan û çandiniyê ku her tim tên hedefkirin. Her wiha diyar kir ku artêşa Tirk a dagirker û çeteyên wê şerê debara wan dikin.

Koçberê ji Efrînê Ebdo Hisên li heman gundî dimîne êrişên dewleta Tirk a dagirker û çeteyên wê yên li ser herêmê şermezar kirin û got: "Dewleta Tirk bi van êrişan dixwaze herêmê vala bike. Lê şêniyên herêmê û koçberên Efrînê li hemberî van êrişan berxwedan esas girtine. Em di mayîna li ser xaka xwe de bi israr in û em nahêlin were dagirkirin."

Welatiya bi navê Semîra Omer ji Efrînê û li Um El-Qura dibîne diyar kir ku şêniyên herêmê xwe li gorî şerê gel ê şoreşgerî bi rêxistin kirine û li hemberî dagirkeriya Tirk û çeteyên wê yek in.

Semîra Omer her wiha got: "Dewleta Tirk a dagirker hewl die me ji xaka me derxîne, lê em ji wê û cîhanê re dibêjin ku em xwediyê vê xakê ne, em ê jê dernekevin, îleh piştî ku Efrîn were rizgarkirin."

ANHA