ˊ Dewleta Tirk û PDK’ê ji bo valakirina 4 gundan dem daye welatiyanˊ
CPT’yê eşkere kir ku PDKˊê tenê 9 saet dem daye welatiyên 4 gundên devera Ber Garê ya Amêdiyê ku serdana gundên xwe bikin û gundên xwe bi temamî vala bikin.
Endamê rêkxistina CPT ya Amerîkî Kameran Osman ji Rojnewsˊê re diyar kir ku rayedarên xwecihî yên navçeya Amêdiyê (rayedarên PDK’yî) welatiyên gundên Mijê, Kevne Mijê, Spîndarê û Gîrgaşê yên devera Ber Garê agahdar kirine ku dikarin îro saet 8:00’ê heta saet 17:00’ê serdana gundên xwe bikin, piştre bi temamî gundên xwe vala bikin û biçin ew cihên ku lê hatine bicihkirin.
Kameran Osman di dewama axaftina xwe de got, welatiyên van her çar gundên Ber Garê nêzîkî mehekê ye ji ber êriş û bombebaranên artêşa Tirkiyeyê li ser gundên wan bi neçarî gundên xwe vala kirine, mal û milkên xwe terikandine û li bajarokê Dêrelok û Dihokê bicih bûne.
Her wiha endamê CPT’yê eşkere kir ku bi hemahengiya hikumeta Herêma Kurdistanê û artêşa Tirk îro destûr ji welatiyên gundên Mijê, Kevne Mijê, Spîndarê û Gîrgaşê yên devera Ber Garê ya Amêdiyê dane ku dikarin di nava 9 saetan de serdana gundên xwe bikin, tiştên xwe yên mayî bar bikin. Her wiha ji bo welatiyên van gundan mêşên xwe yên hinguvê ji gund bibin 9 saet destûr dane wan.
