Pirsgirêka çopê li Hesekê girantir dibe

Diyardeya kombûna çopê li bajarê Hesekê bû sedema ku bêhn bi taxên çop lê heye, bikeve û kêzik derkevin. Bi werza havînê re dibe ku nexweşiyên çerm jî derkevin.

Ajansa me têkildarî kombûna çopê nêrînên şêniyên Hesekê û xebatkarên şaredariyê girt.

Beşar Mihemed ku dikandar e, got li herêmê tevgera bazirganiyê zêde ye û gelek xwaringeh û dikanên şîraniyê hene. Her wiha diyar kir ku her tim çop li kolanan heye û dîmeneke nexweş dide, gel û xwediyên dikanan ji vê rewşê ne razîne û gazincên xwe dikin.

Mihemed ji bo şaredariyê jî got: "Şaredarî her sê rojan carekê û carinan jî hefteyek derbas dibe heyanî ku tê çopê radike. Çop li kolanan kom dibe, em gelek caran çûn şaredariyê û me gazincên xwe kirin lê kesek bersiva me nade û vê pirsgirêkê çareser nake. Demsala havînê em ê zêdetir zehmetiyê bibînin. Dê bêhnên nexweş û kêzik belav bibin."

Dilo Qasim jî têkildarî heman pirsgirêkê wiha got: “Belavbûna çopê li herêma bazirganiyê ne dîmenekî xweşe. Şaredarî karê xwe dike lê belê her sê rojan carekê çopê rabike, têrê nake û çop li ser hevdû kom dibe. Eger şaredarî rojane jî çopê kom bike dê dîsa çop komî ser hevdû bibe. Tevgereke bazirganiyê ya zêde heye û çop zêde ye. Hejmareke mezin a xwaringeh û dikanên firotina xwarinê hene, çopa wan zêde ye û bêhna wê derdikeve. Di havînê de dê kêzik jî derkevin û bibe sedema nexweşî derbikevin. Ez dixwazim ku çareseriyeke baştir bibînin û ji kokê ve pirsgirêka çopê were çareserkirin. Xwediyên dikanan û xwaringehan ji carekê zêdetir bi insiyatîfa xwe xwestin ku herêmê paqij bikin. Em bi hêvî ne ku şaredarî zêdetir bi xwediyên dikan û xwaringehan re bibe alîkar û pirsgirêk çareser bibe."

Hevseroka Beşa Paqijiyê ya Şaredariya Hesekê Cîhan Xelîl têkildarî pirsgirêkê ji ajansa me re axivî û got: "Hesekê bajarekî gelekî mezin e û emrazên me yên paqijiyê kêm in. Piştî ku peymankar xwe ji herêma rojhilat a bajar vekişand em di komkirina çopê de gelekî zehmetiyê dibînin."

Cîhan Xelîl anî ziman ku wan ji bo paqijkirina bajar xwe bi rêxistin kiriye û wiha got: “Sibehê beş başûr a bajar û bazar, êvarê jî beşên rojava û rojhilat ên bajar tên paqijkirin. Em bi derfetên xwe yên kêm hewl didin vê pirsgirêkê çareser bikin. Gel jî bi rêya komîn û meclisan dibe alîkar. Têkildarî paqijiyê me broşûr belav kirin û li taxan bi komîn û meclisan re civiyan. Bi vê hemleyê re me xwest ku şênî bi me re bibin alîkar û di wextê hatiye diyarkirin de çopa xwe deynin derve."

Ji bo rewşa bajar jî Cîhan Xelîl wiha got: "Eger karkerên paqijiyê karê xwe baş nekin şênî dikarin li gel şaredariyê giliyê wan bikin. Bajarê Hesekê jî bajarekî gelekî mezin e. Gelek koçber lê hene û çop gelekî kom dibe. Rojane bi tonan çopê tê komkirin û derdixin ji derveyî bajar."

Ji bo plansaziyên şaredariyê Cîhan Xelîl got: "Me hemleyên paqijkirina bajar zêde kirin. Me ji bazarê û derdora wê dest pê kir. Taxa Xiwêran û herêma rojava jî paqijkirin. Berî du rojan taxa Mişêrfê, bazara El Hal û Til Tewîl paqij kirin. Niha taxên beşê rojava yê bajar weke El Şerîa ma ne em ê paqij bikin."

Cîhan Xelîl anî ziman ku beşên şaredariyê bihevre ketine tevgerê û wiha got: "Beşên şaredariyê xwe birêxistin kirin. Beşê tendirûstiyê destpêkir bajar rojane derman dike, ji ber di havînê de bêhna çopê derdikeve û kêzik zêde dibin."

Her wiha Cîhan Xelîl got qutbûyîna ava stasyona Elok jî dibe sedem ku di kanalîzasyonê de pirsgirêk derkevin û têkildarî planên şaredariyê wiha got: "Em ê emrazên xwe çêkin û bi rêya beşa şopandinê pirsgirêka çopê bişopînin. Em bi hêvî ne ku komîn û meclis bi me re bibin alîkar da ku em vê pirsgirêkê çareser bikin.”

(np)

ANHA