Li Rimêlanê şahiya Zarhunera Havînê

Dibistana Zarhunera Havînê li navenda Çand û Hunerê ya Aram Tîgran a bajarê Rimêlanê bi dirûşma “Em ê xwe fêrî xweşikbûnê û zanînê bikin” mîhrîcanek li dar xist. 

Destpêkê peyama Rêber Abdullah Ocalan a ji bo zarokan, hate pêşandan. Dûre li ser navê Dibistana Zarhunera Havînê Necbîr Xanim axivî û diyar kir ku ev çalakî encama sê mehan a xebat û hewldana bênavber e ku zarok li ser muzîk, şano, wênexêzî û govendê perwerde bibin. 

Necbîr da zanîn ku, pêşxistina behreyê hunerî û çandî yên zarokan, armanca wan a sereke ye. Her wiha dixwazin derfetê bidin zarokan ji bo ku serbest ji civakê re afrînariyên xwe serbest derbirînin. Necîr destnîşan kir ku lidarxistin û berdewamkirina mîna van çalakiyan ji bo avakirina kesayeta zarokan û xurtkirina baweriya wan bi xwe, gelekî girîng e.

Piştre, koma Kûlîlkên Rojava, koma Parkîn û koma Girbawî bi stranên xwe şênî çoşand.

Her wiha koma Rîwan, koma Şehîd Feraşîn, koma Bavê Tayar, koma zarokan a Til Koçerê, koma Efrîn û koma Ava Mezin şano pêşandan.

Koma Zeryên Xweristî, koma Şehîd Jînda û koma Şehîd Lorîn a ereb, govendên floklorî gerandin.

Di mîhrîcanê de, hezar û 984 wêneyên tabloyên ku zarokan biboneya 15`ê Tebaxê xêz kirine, hatin pêşandan.

Çalakî bi kêfxweşî û gerandina govendê ji aliyê malbatên zarokan ve bi dawî bû.

(ac/şx)

ANHA